RCD / #ANOSACASA / ABANCA-RIAZOR / PALCOS VIP

PALCOS VIP

Co inicio da Temporada 2001-2002 o RC Deportivo inaugurou os Palcos VIP do Estadio de Riazor, unhas instalacións ao máis alto nivel, orgullo do Deportivo e un referente para outros estadios.

Construídos na bancada de Preferencia, entre Preferencia Inferior e Superior. Unha obra de grande envergadura realizada onde antes só había 5.000 metros cúbicos de rocha e terra. Desde eles as empresas que os adquiriron e os seus convidados gozan do espectáculo futbolístico desde un enclave privilexiado cunha panorámica xeral do estadio espectacular e sen perder o ambiente propio das tardes e noites de fútbol, xa que as terrazas desde as que se ve o partido non illan, como sucede noutros estadios, ao espectador.

UN PALCO VIP

As principais empresas de Galicia dispoñen do seu Palco VIP no Estadio de Riazor, onde os seus convidados poden gozar das máximas comodidades mentres ven os partidos do Deportivo, que ofrece aos asistentes distintos menús segundo o partido se dispute á primeira hora da tarde ou pola noite, ademais de servizo individualizado de azafata.

Cada palco ten a súa terraza independente con capacidade para dez persoas e todas elas permiten unha visión perfecta do encontro desde unha posición exclusiva e moi cómoda. Nelas ademais dispoñen dunha televisión para ver as xogadas repetidas. No seu interior conta con outra televisión, zona de reunión e descanso, baño individual e minibar.

ZONA COMÚN

Os convidados dos Palcos VIP acceden ao recinto pola súa entrada independente e son recibidos polo persoal do Club. Nesta zona dispoñen dunha pequena tenda onde poden adquirir calquera produto oficial do RC Deportivo.

Todas as instalacións teñen unha decoración uniforme baseada fundamentalmente nos elementos construtivos xa que a zona común atópase xusto baixo a bancada de Preferencia Superior. Predominan os materiais cálidos e de calidade como a madeira, a lousa ou o mármore para crear un ambiente acolledor. Os palcos dispoñen dunha zona común na que os convidados dos distintos palcos poden charlar animadamente antes do encontro ou no descanso do mesmo.