Fede Cartabia e Fede Valverde clausuraron hoxe venres, coa entrega de diplomas, a quinta e última quenda do DéporCampus Cabreiroá 2017 de Abegondo.
O acto desenvolveuse no campo de herba sintética da Cidade Deportiva de Abegondo.
Como é habitual, os dous futbolistas entregaron persoalmente a cada participante o seu diploma; e pousaron con cada un dos 9 grupos. Unha foto de familia e un sorteo de agasallos puxeron o punto e final.
Esta semana, do 24 ao 28 de xullo (incluído o martes 25, festividade do Apóstolo), a actividade dos DéporCampus Cabreiróa 2017 reuniu a 200 nenos distribuídos na quinta e última quenda de Abegondo, Ordes e Monforte.
Este ano, a sede central na Cidade Deportiva de Abegondo pasou de 3 a 5 semanas de actividade (a última de xuño e todo xullo). Os DéporCampus Cabreiroá, que este ano bateron a marca de inscricións, estrearon ademais 4 sedes: As Pontes, Santiago, Ordes e Zas, que se suman ás xa existentes en Abegondo, Viveiro, Rianxo, Bertamiráns, Ferrol, Monforte e Xenebra (Suíza).
O RC Deportivo organizou esta actividade dirixida polos técnicos do Club co obxectivo de transmitir habilidades e conceptos futbolísticos, ademais dos valores que representa o Dépor: respecto, solidariedade, amizade, xogo limpo, integración, esforzo e felicidade.
Máis aló das actividades, o equipamento deportivo (composto de camiseta, pantalón e medias), a froita e o zume diarios, o diploma final, a visita dun dos xogadores do primeiro cadro deportivista (sempre dentro das posibilidades do calendario do equipo) e un sorteo final de agasallos, foron outros dos atractivos dos DéporCampus Cabreiroá, que tiveron un horario de mañá de 10:00 a 14:00 horas.
