RCD / RCDEPORTIVO / SECCIÓNS / CICLISMO

CICLISMO: BERRENDERO, DELIO E UNHA MEMORABLE VOLTA A ESPAÑA

O RC Deportivo aposta forte polo ciclismo, deporte no que na súa primeira temporada arrasa a nivel nacional, pois en Europa apenas hai competicións debido á II Guerra Mundial. Os corredores deportivistas (que patrocinados por González Byass visten de amarelo aínda que co escudo do Club no peito) vencen en case todas as probas do calendario nacional. O RC Deportivo conforma un auténtico 'dream team', con Julián Berrendero, Delio Rodríguez, Antonio Martín, Fermín Trueba e José Jabardo como principais figuras.

O punto álxido é a aínda nova Vuelta a España, que cumpre a súa cuarta edición. O gran rival do RC Deportivo é o FC Barcelona, que forma con outros grandes ciclistas do panorama nacional como Diego Cháfer, Antonio Andrés Sancho ou Juan Gimeno. Tamén comparece, malia o conflito bélico, unha selección francesa con varios nomes de prestixio como René Vietto (2º no Tour de 1939), Pierre Brambilla ou Louis Thiétard. É un ciclismo moi diferente ao actual. O pelotón fórmano 43 corredores, en equipos de 5 ou 6 compoñentes. E ningunha das 17 etapas ten final en alto.

Berrendero e Sancho inician o seu man a man cunha escapada na primeira etapa, entre Madrid e Albacete. Gaña a etapa o deportivista, que vístese a camisola laranxa de líder. Ambos adquiren cinco minutos de vantaxe sobre os seus máis inmediatos seguidores. Os deportivistas gañan as 7 primeiras etapas: cinco con Delio Rodríguez e unha con José Jabardo, máis o mencionado triunfo inicial de Berrendero. Con todo, ven como se lles complica a clasificación por escuadras ao retirarse Fermín Trueba na 1ª etapa e Antonio Martín na 2ª xornada.

Na 10ª etapa, con meta en Santander, Berrendero pega un machadazo que ao cabo será definitivo, ao descolgar a todos os seus rivais a metade da subida ao Collado de Asón e cabalgar en solitario cara á capital cántabra a través do Porto de Alisas. Cháfer, segundo na xeral, queda a 12:41. E Sancho, terceiro, a 13:20.

A carreira chega a Coruña na 15ª xornada, na que os deportivistas levan senllos pequenos paus. Unha picada fai ceder un minuto a Berrendero, mentres Delio perde por primeira vez en toda a carreira unha chegada ao sprint. Na liña de meta de Juan Flórez imponse o galo Thiétard.

Ao día seguinte, o FC Barcelona leva a contrarreloxo por equipos entre A Coruña e Santiago de Compostela. Sancho e Cháfer recortan 2.22 a Berrendero que, aínda así, goza dunha marxe importante con só tres etapas por diante. Na última xornada, camiño de Madrid, Cháfer téntao no Porto de Navacerrada, pero leva á súa roda ao italiano Camilla e ao propio Berrendero.

En resumo, Julián Berrendero leva a vitoria na clasificación xeral, máis dúas etapas e a camisola de rei da montaña. Delio Rodríguez imponse nada menos que en oito etapas e José Jabardo nunha, co que os deportivistas levan 11 dos 20 parciais. Con todo, a clasificación por equipos é para o FC Barcelona.

Non todo se reduce ao ocorrido entre o 30 xuño e o 17 de xullo na rolda hispana. Berrendero leva a Volta a Levante e o Campionato Nacional en Ruta. Antonio Martín conquista un Circuíto de Castela-León-Asturias no que Delio Rodríguez leva cinco das sete etapas. Fermín Trueba gaña a Subida ao Naranco, o Cinturón de Bilbao e o Campionato Nacional de Escalada en Ruta. Vicente Carretero vence o Circuíto da Ribeira do Jalón. E o gran Delio imponse na durísima proba dun día Madrid-Valencia. O RC Deportivo pecha a súa primeira temporada coa fantástica cifra de 34 vitorias.

A Vuelta a España non se celebra en 1943 e 1944 pero os deportivistas seguen adiante esas dúas temporadas. Xa sen Berrendero, Jabardo, Trueba, Martín e Carretero, os ponteareáns irmáns Rodríguez (Delio, Pastor, Emilio e Manuel) son os líderes do equipo. En 1943, Delio imponse na Subida ao Naranco e en tres etapas da Volta a Cataluña. En 1944, os Rodríguez abandonan a disciplina branquiazul. O equipo queda formado por corredores locais, como Antonio Folgar, Arturo Ponte ou José Silva, que unicamente participan en probas rexionais, como a Volta a Oza. É o epílogo á efémera pero brillante sección de ciclismo do RC Deportivo.