Carles Gil lembrou esta mañá na sala de prensa de Abegondo que, "a pesar de mellorar un pouco na clasificación aínda estamos aí abaixo. Cada partido para nós é unha final ou un partido moi importante".
Por este motivo, cre que "sería un erro pensar en #ONOSODERBI (do domingo 19 de marzo en Riazor, 18:30, Bein Sports) antes do partido do domingo (ante o Barcelona, 12 de marzo en Riazor, 16:15, Bein Sports)".
Apercibido de sanción, insiste no discurso do técnico Pepe Mel: "É un erro que calquera dos que estamos neste caso apercibidos esteamos a pensar nos cartóns que levemos. Para iso é mellor que xogue outro. Hai que xogar ao cento por cento. Encima o Barça é un equipo que che leva ao límite, que vas ter que facer faltas para parar o seu ataque. Se neste caso se xogamos algún e recibimos cartón, pois ao final o importante é o equipo. Se non está un, estará outro".
Despois de quince días frenéticos de partidos, Carles Gil asegura que "calquera xogador que xogue o domingo vai estar ao cento por cento. O míster pídenos honestidade, que sexamos sinceros con el. Se estamos ao cento por cento ou non. Eles tamén veñen dun esforzo psicolóxico e físico moi grande. Nese sentido non temos escusa".
A pesar do complicado da empresa de vencer a "un dos mellores equipos do mundo, por non dicir o mellor, cos mellores xogadores", o atacante deportivista "confía en poder levarnos os tres puntos. Sei que é moi complicado. Pero sabemos que temos as nosas opcións e temos que agarrarnos a iso. Confío plenamente no equipo e en que podamos conseguilo".
Lembra que no Santiago Bernabéu na primeira volta da liga, "un campo moi moi complicado e encima fóra de casa, estivemos a nada de levarnos os tres puntos. Contra o Barcelona será igual".
Que o Barcelona chegue a Riazor despois dunha remontada histórica en Liga de Campións ante o Paris Saint-Germain convérteo, a xuízo de Carles Gil, en "máis perigoso. Cando estás con mentalidade positiva, co ánimo subido, é un plus engadido. Pásanos a todos. Se ademais engádesllo a este tipo de xogadores, son máis perigosos aínda".
