O Deportivo sufriu a súa segunda derrota no campionato. Tras caer ante o campión de Liga, hoxe o fíxo ante o líder, unha Real Sociedad que aproveitou dous momentos de desconcerto nas filas branquiazuis para levar o tres puntos da Coruña nun encontro que tivo moitas fases distintas.
O equipo vasco xa gañaba por 0-2 aos 4 minutos, o Dépor chegou a empatar nada máis comezada a segunda metade e os donostiarras selaron a vitoria con dous goles tamén consecutivos no tramo final.
O técnico deportivista, Pepe Mel, modificou o debuxo táctico do equipo con respecto aos mostrados nas dúas primeiras xornadas do campionato, pasando a xogar cun 4-4-2. O adestrador branquiazul realizou tres cambios con respecto ao once que introduciu de inicio no anterior partido, fronte ao Levante no Ciutat de València. Przemysław Tytoń substituíu a Rubén Martínez na portería, mentres Zakaria Bakkali e Emre Çolak deixaron os seus postos a Bruno Gama e Adrián López.
O partido non puido comezar peor, pois a Real converteu en gol os seus dous primeiros tiros a porta, antes de que se cumpriu o minuto 5. En primeiro lugar, Juanmi aproveitou un centro de Xabi Prieto desde a dereita para bater a Tytoń cun preciso remate. Acto seguido, Illarramendi enganchou un durísimo disparo á saída dun saque de esquina, ante o que o meta polaco non puido reaccionar debido á cantidade de xogadores que lle tapaban a visión.
Os branquiazuis trataron de reaccionar pronto e antes do minuto 10 roldaron a portería de Gero Rulli nun par de ocasións, a mellor nun lanzamento lonxano de Juanfran que tocou nun defensa e estivo a piques de sorprender ao porteiro donostiarra.
A Real practicamente monopolizou a posesión durante o seguinte tramo de encontro, aínda que carente de profundidade. Ao Dépor a pelota duráballe moi pouco no seu poder.
Con todo, superado o ecuador do primeiro período, o Dépor fíxose co balón para protagonizar unha posesión infinita, con varias incursións frustradas no último pase pola zaga visitante. A acción concluíu cun fantástico pase longo de Fabian Schär que rematou de maneira non menos sensacional Adrián, ao primeiro toque, co interior da súa bota dereita, buscando e atopando a cepa do poste esquerdo da meta realista. O 1-2 chegaba antes de cumprirse a media hora para meter de novo no partido ao equipo coruñés.
No tramo final, o Dépor encerrou á Real na súa área. Nos últimos cinco minutos, Schär non chegou por milímetros a cabecear un centro de Juanfran, Adrián non puido rematar en posición ideal unha deixada coa testa de Guilherme e Andone, tamén coa cabeza, rematou frouxo ás mans de Rulli un balón que quedara solto moi preto do portal realista.
A segunda metade comezou cun Dépor mandón e co regreso de Lucas Pérez, que substituíu a Bruno Gama no minuto 49. Só uns segundos despois, os branquiazuis lograban o 2-2. Juanfran centrou desde a dereita a perna cambiada, Adrián superou a Odriozola no salto e deixou o balón de cabeza para que Andone fusilase a Rulli.
A Real reaccionou rapidamente, tratando de aproveitar a presenza de moitos dianteiros no once deportivista. Os donostiarras roldaron o gol en varias accións: primeiro, nun disparo de Illaramendi que sacou Schär practicamente baixo o traveseiro. Máis adiante, nun remate de Iñigo Martínez no segundo pau que saíu lamendo o poste contrario.
O encontro equilibrouse superada a hora de xogo. Pepe Mel reforzou a medular con Fede Valverde en lugar de Fede Cartabia. Aínda que a Real continuou tendo maior posesión, a paridade na zona ancha fixo que o partido discorrese sen producirse ocasións claras en ningunha das dúas portarías.
A un cuarto de hora da conclusión, Aritz lesionouse pero seguiu no terreo de xogo ao realizar Eusebio Sacristán os tres cambios. A pesar de estar practicamente con dez xogadores, a Real atopou o terceiro gol pouco despois, nun córner que ninguén acertou a rematar de cabeza e introduciu na portería local, en posición antirregulamentaria e case sen querer, Diego Llorente. Poucos segundos despois, Illarramendi sentenciaba o encontro cun disparo desde a frontal da área.
No tempo de prolongación, Lucas gozou dunha boa ocasión que concluíu nun saque de esquina que el mesmo lanzou directamente a portería e estrelou no traveseiro.
RC Deportivo: Tytoń, Juanfran, Schär, Sidnei, Luisinho, Fede Cartabia (Fede Valverde, min. 64), Guilherme, Pedro Mosquera, Bruno Gama (Lucas, min. 49), Adrián e Andone (Bakkali, min. 71).
Real Sociedade: Rulli, Odriozola, Aritz, Iñigo Martínez (Llorente, min. 66), Kevin Rodrigues, Xabi Prieto, Illarramendi, Zurutuza, Januzaj (Carlos Vela, min. 74), Willian José e Juanmi (Canales, min. 54).
Goles: 0-1 Juanmi (min. 3); 0-2 Illaramendi (min. 4); 1-2 Adrián (min. 27); 2-2 Andone (min. 50); 2-3 Llorente (min. 83); 2-4 Illarramendi (min. 86).
Árbitro: Munuera Montero (c. andaluz). Cartón amarelo a Juanmi (min. 44), Guilherme (min. 47), Kevin Rodrigues (min. 54) e Odriozola (min. 80).
Incidencias: partido correspondente á 3ª xornada de LaLiga Santander disputado no Estadio ABANCA-RIAZOR ante 21.942 espectadores.
