RCD / NOVAS

Adrián: "O vestiario está ao cento por cento co camiño que nos está mostrando o míster"

10/03/2018 14:59

Adrián López foi o protagonista este mediodía na sala de prensa de Abegondo. Asegurou que o vestiario deportivista está "ao cento por cento co camiño que nos está mostrando o míster. Cremos en todas as formulacións que el nos di, nos adestramentos que estamos a facer. Nese aspecto todos estamos contentos. Falta atopar esa vitoria que é moi necesaria en todos os sentidos á parte de polos puntos porque levamos moito tempo sen conseguir a vitoria e necesitámola en todos os sentidos para tentar virar isto".

Explica que Clarence Seedorf "analiza todo do rival e dáche todas as opcións que el cre que lle poden facer dano, como contrarrestarlles..."

Do partido de onte, o dianteiro asturiano cre que "desde o meu punto de vista era o típico partido de 0-0. Esas dúas xogadas (a balón parado) sácannos do partido".

Insiste Adrián en que "nós pensamos que o equipo mellorou en moitas cousas, sobre todo durante a temporada que a nosa materia máis pendente estaba a ser esa solidez que necesitamos ter como equipo. Creo que a temos máis. Non nos fan tantas ocasións como nos facían. Non encaixamos tantos goles. Temos que tentar facer gol, tentar poñernos por diante nalgún partido, a ver se así indo a cousa un pouco máis de cara somos capaces de acabar sacando os 3 puntos. Houbo uns cantos partidos que podiamos conseguir iso, e faltou un pouco de fortuna. Sobre todo en casa estamos a ser máis perigosos e merecemos máis nos últimos partidos".

Por conseguinte, coincide co técnico ao concluír que "tamén vexo cousas positivas no equipo e na situación na que estamos é importante sacar cousas positivas. Sempre hai cousas que corrixir, que mellorar, que temos que seguir traballando nelas. Pero hai que sacar cousas positivas para ver que somos capaces de levantarnos disto".

Do encontro do próximo sábado no Estadio ABANCA-RIAZOR ante a UD Las Palmas (13:00 horas, Bein LaLiga), cualifícao como "un partido moi importante ante un rival directo, que está na pelexa connosco aí abaixo. Xogamos na nosa casa. Temos que tentar sacar a vitoria si ou si porque o queremos, necesitámolo. Hai que expoñer o partido da mellor maneira posible para facer un partido parecido aos que fixemos ultimamente en casa. Facendo partidos así é complicado que se nos sigan escapando puntos".

Máis novas de: ADRIÁN