Raúl Albentosa foi o protagonista esta mañá na sala de prensa de Abegondo. O central valenciano manifestou que verse fóra dos postos de descenso após o empate colleitado o pasado domingo polo Deportivo en Vilarreal "inflúe positivamente. Evidentemente, até a última xornada queda moitísimo. De cara ao vindeiro partido, o punto é un bo punto para vernos fóra".
Cara ao choque deste sábado 13 de xaneiro no Estadio ABANCA-RIAZOR ante o Valencia CF (20:45 horas, Bein LaLiga), asegura que "hai máis confianza. Isto do fútbol é moito de confianza. Agora mesmo, despois do partido do outro día, témola nós mesmos".
Explica que esta temporada para o Deportivo "está a ser un calco da temporada pasada, mesmo creo que levamos menos puntos. Cústanos sacar os 3 puntos de calquera partido, sexa o que sexa. Temos que coller máis regularidade e tentar ir paso a paso, pero dando pasos de xigante cara a adiante".
Do equipo valencianista, recalca que "o punto positivo do Valencia foi Marcelino (García Toral). É o que fixo que o Valencia vaia cara arriba. Á parte de que o ano pasado tiña bo cadro, e este ano tamén, o adestrador deu coa tecla de unir todas as pezas e vailles moi ben".
Destaca do seu cadro a Dani Parejo: "Todos son perigosos pero hai un xogador que leva todo o equipo que é Parejo. Por el pasa todo. Dese xogador é do que debemos estar moi atentos".
Preguntado sobre a situación clasificatoria do Dépor, con cada vez menos equipos na zona baixa da clasificación, Albentosa opina que "queda moito. Vai haber máis equipos que van estar aí connosco. Temos que mentalizarnos que aos poucos temos que sacar isto adiante. Igual que fixo o Eibar, de gañar moitos partidos seguidos. Son xeiras. Temos que buscar ese camiño".
A nivel particular, no seu retorno ao once inicial, dixo sentirse "ben fisicamente, que era o que tes un pouco máis na cabeza, nervioso por estar tempo sen ter ritmo. Ben nese aspecto".
Agora espera que após o bo rendemento no Estadio de la Cerámica, "véxaseme doutra forma. Cambiamos de ano. Estamos no 2018. Deixamos atrás o 2017, que foi un ano difícil. A ver se podo dar confianza á xente e que a xente me dea confianza a min".
Iso si, confesa que "por sorte ou por desgraza nunca me tocou estar nesta situación de participar tan pouco. Lévoo difícil. É moi complicado. A min gústame que o que fago nos adestramentos poder facelo a fin de semana. Pero polo que sexa este ano estou a ser menos utilizado e claro que o levo moi mal. Non vouche mentir".
Por este motivo, explica que "se non xogas, non te sentes realizado e queres ver outra cousa. Pero isto do fútbol cambia cada momento, cada hora, cada día. Parece que estaba máis fóra que dentro, e agora hai que poñerllo díficil para seguir xogando".
Advirte que "os meus amigos que están metidos no fútbol dinme que tes que adestrar, sentirche ben co que fas durante a semana e logo xa non depende de ti. Fódeme como a calquera persoa en calquera traballo que non sente a disposición de poder render".
Finalmente, en canto ao mercado de inverno, Albentosa é da opinión que "os que estamos aquí somos os que temos que sacalo. Se veñen achegar outros xogadores, pois bo. Pero agora mesmo os que estamos aquí somos os que temos que sacar os puntos. Temos equipo para iso".
