Álex Bergantiños convértese no 18º deportivista en alcanzar os 300 partidos oficiais
Álex Bergantiños entra hoxe de cheo en #ANOSAHISTORIA ao converterse no décimo oitavo dos máis de mil futbolistas que disputaron algún partido oficial co RC Deportivo que alcanza os 300 encontros defendendo a camiseta branquiazul.
Pasou pouco máis dunha década do seu tardío debut oficial co primeiro equipo deportivista, pois antes de dar o salto foi cedido a Xerez CD durante dúas campañas, mentres que noutra máis estivo a préstamo no Granada CF e o Gimnàstic de Tarragona. Álex estreouse co Dépor con 26 anos, o 27 de agosto de 2011, en partido de Segunda División en Riazor ante o Recreativo de Huelva (1-0).
Con anterioridade, Álex disputara diversos amigables co primeiro equipo. O primeiro deles remóntase ao 29 de marzo de 2005, cando o Dépor mediuse ao Atlético Arteixo (6-0) en Riazor nun choque benéfico para recadar fondos para o conxunto branquivermello debido á súa precaria situación económica.
Álex asinou 10 goles, algún deles histórico como os logrados no Camp Nou (2-2) na Temporada 2015-16 e un curso despois na vitoria ante o FC Barcelona en Riazor (2-1).
Álex pertence á disciplina deportivista desde que ingresou no Club sendo xuvenil, en 2002. Desde a súa chegada procedente do Imperátor OAR son xa 20 temporadas como branquiazul. En 4 delas (2004-2008) formou parte do Fabril, co que disputou 152 partidos que o converten no 11º xogador que máis encontros disputou na historia do filial.
Máis aló das súas actuacións co Deportivo e o Fabril, Álex demostrou ser un exemplo de responsabilidade fóra do campo e de compromiso e limpeza dentro del. Isto último demóstrao o feito de que nos seus máis de 450 partidos no fútbol profesional nunca viu unha cartolina vermella.
Ademais, Álex é o cuarto futbolista nado na Coruña que alcanza as 300 aparicións co equipo da súa cidade. Con anterioridade soamente lográrono Juan Acuña, Jorge e Loureda.
Para elaborar esta lista, o RC Deportivo toma en conta calquera encontro no que o xogador saltase polo menos un minuto ao terreo de xogo co primeiro equipo en Liga –xa sexa en Primeira, Segunda, Primera RFEF, Segunda B ou Terceira–, Copa de España, Supercopa de España, Copa da Liga, promocións entre Primeira e Segunda e entre Segunda e Terceira, Liga de Campións, Recopa de Europa, Copa da UEFA, Copa Intertoto e Campionato de Galicia –disputado entre 1917 e 1940–, ademais de calquera partido anterior a 1917 a pesar de non ser considerados oficiais.
Estes son os 18 futbolistas que disputaron máis de 300 partidos oficiais co RC Deportivo:
Xogador | Partidos | Anos | |
1 | Fran | 700 | 1987-2005 |
2 | Manuel Pablo | 482 | 1998-2016 |
3 | Mauro Silva | 459 | 1992-2005 |
4 | Valerón | 422 | 2000-2013 |
5 | Donato | 393 | 1993-2003 |
6 | Sergio | 383 | 2001-2010 |
7 | Juan Acuña | 380 | 1937-1955 |
8 | Piña | 340 | 1973-1983 |
9 | Pancho García | 331 | 1975-1985 |
10 | Domínguez | 327 | 1960-1971 |
11 | Vicente | 325 | 1980-1989 |
12 | Jorge | 323 | 1977-1991 |
13 | Loureda | 319 | 1962-1974 |
14 | Romero | 306 | 1998-2006 |
15 | Silvi | 305 | 1980-1988 |
16 | Guimeráns | 304 | 1937-1950 |
17 | Scaloni | 301 | 1997-2006 |
18 | Álex Bergantiños | 300 | 2011-2017 / 2018-2022 |