Álex lembra que o equipo "está en construción" e Bóveda asegura que "temos máis que ofrecer. E ímolo a facer"
Os capitáns Álex Bergantiños e Eneko Bóveda atenderon aos medios de comunicación na zona mixta do Alcoraz.
O mediocentro coruñés apunta que "na primeira parte saíron eles moito mellor. Eran moi gañadores nas segundas xogadas. Despois do 1-0 houbo uns minutos que melloramos un pouco e xusto na última xogada da primeira parte vén o golazo. É un pouco indefendible, queda un balón solto aí, cóllea de primeiras e xa nos complica o partido por completo".
Após o descanso, explica Álex, "arriscamos máis, tentamos deixar man a man atrás. Puxémoslles en dificultades pero si é verdade que deixamos demasiadas opcións para que eles puidesen facer algún gol máis".
En opinión do futbolista branquiazul, os futbolistas da SD Huesca "interpretaron mellor o xogo con esas segundas xogadas e ese xogo por banda no que nos facían superioridade. Ao final sempre sentiamos que chegabamos tarde. A nosa idea era tentar apertar máis arriba, que non saísen fácil, pero cada vez que lanzaban estabamos demasiado partidos. Iso facía que fosen moi gañadores na segunda opción e parecese que o dominio era deles".
Con só 2 partidos disputados, asegura que "todos queremos dar mellor imaxe. Sabemos como é a categoría, como son estas primeiras xornadas en España co mercado e a calor que fai. Sempre se dan resultados estraños aínda que hoxe entra no posible perder contra un bo equipo como o Huesca. Temos un equipo en construción. Temos que ir mellorando. E nin a semana pasada nin no Teresa Herrera eramos tan bos nin agora somos tan malos por esta derrota. Hai que seguir traballando, mellorando e sobre todo pensar en cortar esa sangría de goles en contra porque nesta categoría se encaixas tanto é moi difícil que sumes puntos".
Así pois, pide Álex Bergantiños "coller as cousas que fixemos mal, valoralas entre todos e ir mellorando como equipo, que ten que ser un equipo que mellore en defensa co paso das xornadas".
Conclúe que "non estamos para nada satisfeitos. É un partido que doe porque ao final tivemos erros individuais importantes. Hai que minimizar o máximo posible este tipo de situacións e converternos nun equipo máis serio que encaixe menos, porque se non imos ter difícil puntuar neste tipo de partidos", insiste.
Pola súa banda, outro dos capitáns, Eneko Bóveda, sostén que foi "unha mala tarde. Moito que mellorar, moito que mirarse sobre todo cada un no espello. A partir de aí, canto máis frías sexan as análises, mellor".
O lateral vasco cre que "foron mellores, dos 90 minutos unha porcentaxe moi alta. ¿Porqué? Porque foron máis vivos, máis contundentes no xogo cando os balóns se dividían. E a partir de aí, fóronnos metendo no noso campo. Crecéronse, soltábanse, saíanlles ben as presións. Cando un equipo vai a máis, o outro vai a menos".
Dos 5 goles encaixados polo Deportivo nos 2 primeiros partidos de liga, Bóveda indica que "a mostra é pequena. Son dous partidos diferentes. A análise dun non se se vale para o outro. Máis aló dos goles, temos máis que ofrecer e ímolo a facer".
Segundo o defensor branquiazul, a poucos días do peche de mercado, "non me toca a min e non sei que sentido ten que os xogadores pidan reforzos. Non vin a ningún xogador que pida reforzos na súa posición. Nada de mirar fóra. Nestes casos o mellor é mirar cara adentro. Temos moito máis. De feito hoxe houbo un momento no que se viu ao equipo que se soltaba, que se desbloqueaba e que o partido ía máis parello. Eles foron mellores e se xogásemos o partido 5 veces, isto non volvería pasar. Pero pasou".
Preguntado pola lesión de Somma, afirmou Bóveda que "é un golpe. Pero aos golpes téndese a quitarlles importancia e... O primeiro é que fagan un bo diagnóstico e coidarano ben seguro".
En canto a Peru Nolaskoain, operado esta mesma tarde dunha apendicitis, lamentouse Eneko porque "o mozo estaba súper ilusionado. Víao ben, contento. Incorporouse tarde e con ganas de meterse. É un revés para el, para o equipo tamén. A nós tócanos apoialo; a min persoalmente como compañeiro e amigo estar para o que necesite. A temporada é longa e Peru vainos achegar".
Finalmente, conclúe que esta derrota, de cara ao futuro, "serve seguro. Cando che meten o peito cara adentro, un empeza a dar voltas á cabeza e ver que aquí non son tan bo, aquí podo facer máis. Seguro que entre todos sacamos cousas positivas. Tampouco dramatizar agora porque igual que tentamos ser humildes nas vitorias, de pouco serve ser agoreiros ou agonías cando hai un revés. Á fin e ao cabo, ningún conta con que gañemos todos os partidos de liga".
