RCD / NOVAS

Andone: "Temos que aprender dos erros para plasmalo nos próximos partidos"

01/08/2017 20:50

Florin Andone manifestou esta mañá na sala de prensa de Abegondo, respecto ao encontro do pasado domingo en Porto, que "foi un partido difícil. O FC Porto gañounos xustamente. Foron mellores que nós, fixeron mellor as cousas. Temos que aprender dos erros que cometemos para plasmalo nos próximos partidos que temos".

Lembra que o partido no Dragão "non deixa de ser pretemporada, non deixa de ser un amigable. Hai que pasar páxina canto antes. Mentalizarnos de facer unha boa semana de adestramentos e partidos que temos. E logo xa pensar na liga".

Conclúe o dianteiro deportivista que "asino perder todos os que nos quedan de pretemporada e gañarlle ao Real Madrid".

Precisamente dese encontro ante o conxunto branco que abrirá LaLiga Santander (domingo 20 de agosto no Estadio ABANCA-RIAZOR, 22:15, Movistar Partidazo), Andone advirte que "é un partido máis, é un partido que temos que xogalo, dá igual a xornada 1 que a 18. Tentarémolo facer da mellor forma posible. Esperemos que teñamos un gran día e que fagamos un bo papel".

Comprende que o equipo teña que reforzarse na punta de ataque: "Non podemos estar cun dianteiro toda a liga. Esperemos que veña canto antes, se vén, que seguro que virá. Que nos achegue traballo, ilusión, ganas".

Cara ao Trofeo Teresa Herrera deste sábado no Estadio ABANCA-RIAZOR (20:30 horas) ante o West Bromwich Albion inglés, pide o ariete branquiazul "xogar ben, gañar o partido que é o máis importante, porque xa o ano pasado gañámoslle 2-0 ao Villarreal, creo que xogamos bastante ben. Este ano, diante do noso público, o primeiro partido do ano, no noso estadio, temos ganas de que chegue o día, de facer un bo partido e de gañalo. Ao final esperemos que a xente teña ilusión pola nova temporada, que estea connosco e que sintamos o agarimo desde o primeiro día".

Máis novas de: ANDONE