RCD / NOVAS

Anquela: "É moi importante empezar sumando"

18/08/2019 21:05

Juan Antonio Anquela manifestou na sala de prensa de ABANCA-RIAZOR que "é moi importante empezar sumando", en alusión ao triunfo do Dépor contra o Real Oviedo, primeiro da Temporada 2019-2020.

O técnico deportivista recoñece que lle faltou ao equipo "frescura e sobre todo tranquilidade nos metros finais. Perdemos accións boas, xogadas boas por precipitación. E o que máis me gustou é que até o final estivemos aí. Esta é a Segunda División, e o que non queira entendelo, non está no camiño. Se ti crees que vas gañar un partido en Segunda División cómodo, estamos a equivocarnos. Temos que traballar como hoxe e ter a fortuna que hoxe tivemos".

Máis que actuacións individuais, Anquela queda "co colectivo. A primeira parte fomos un equipo moi serio. Na segunda con todo... Houbo moitos partidos dentro do mesmo partido. Cando máis fácil o tiñamos, complicóusenos. E canto máis difícil púxosenos ao final, tivemos a sorte de sacalo adiante".

Pola súa banda, Sergio Egea, técnico oviedista, afirmou que "viñemos a un campo difícil e competimos moi ben. O que prometeramos, que o equipo ía ser difícil en todos os campos, fixémolo ben. O fútbol son goles e a diferenza está no acerto do cadro de persoal do Deportivo".