Antoñito e Diego Villares pasáronse pola zona mixta de ABANCA-RIAZOR finalizado o encontro ante a AD Mérida.
O lateral andaluz advertiu que sufrir como esta tarde, con triunfo de penalti no minuto 94, "é o que toca agora nesta segunda volta. Os equipos refórzanse, xóganse a súa liga e é complicado gañar. Hai que saborear esta vitoria con sufrimento. É mellor así porque quedaron os 3 puntos en ABANCA-RIAZOR".
Con partido o domingo en San Sebastián de los Reyes, lembra que "somos o Dépor, temos que ir a todos os campos a gañar. Agora veñen dous partidos seguidos fóra de casa e hai que conseguir gañar. Non hai outra para manterse aí arriba".
Lembra que esta tarde ante o AD Mérida "chegamos moitas veces arriba. Cando se pechan cunha liña de 6 é moi difícil buscar ocos. Marcan a Lucas con dous defensores e é moi difícil atoparlle".
Pola súa banda, Diego Villares afirmou que "con este gol ímonos máis contentos todos".
O mediocentro galego sostén que "eles estiveron moi ordenados e apenas nos deixaron espazos por dentro. Chegabamos fácil á súa liña de tres cuartos pero despois para crear perigo e ocasións claras custábanos un pouco máis. Estaban moi metidos atrás para saír á contra".
Preto da cabeza, Diego Villares valora positivamente esta circunstancia para "meter presión aos que xogan mañá. Agora tócanos xogar fóra de ABANCA-RIAZOR, dar un pasiño máis e volver á vitoria".
