Abdoulaye Ba pasouse esta mañá pola sala de prensa de Abegondo minutos antes de arrincar o seu adestramento.
Reitera, do mesmo xeito que a primeira vez que compareceu ante os medios de comunicación na súa presentación, que está no Dépor "para axudar ao máximo". Neste sentido, insiste en que ten "moita alegría e estar moi contento de estar aquí".
Deixa claro que o Dépor "ten un equipo que non se merece estar onde está. Veño achegar a miña experiencia, axudar ao equipo porque hai un plantel moi bo. Desde que estou a adestrar aquí pregúntome como é posible con este cadro estar nesta posición. Cando comparas con outros equipos de Segunda División, o Dépor debe xogar para subir. Teño confianza no cadro".
Recoñece pasar un tempo "complicado" no Rayo Vallecano pero agora "estou a adestrar ao 100%. Quero recuperar o meu nivel porque a miña idea é quedarme no Dépor. Sinto a gusto e vou dar o máximo para dar rendemento, alegría, felicidade á afección".
Cun posible reinicio de LaLiga a mediados de xuño, Ba apunta que "o que quero é xogar. A miña maior alegría é dentro do campo. Pero con coidado porque respecto moito esta pandemia. O mellor é mentalizarse que haberá competición. Hai que dar o 300% en cada adestramento, coma se fose o último día antes de xogar. Debo manter o meu nivel, concentrarme e ter confianza da xente".
Despois de pasar o mes de Ramadán, o defensor deportivista asegurou estar perfectamente, con "o coidado do doutor, que é moi profesional; e coas condicións que me pon para poder render. Teño fe, son musulmán pero non inflúe no meu traballo. Sempre dei o 100%. Nunca parei, nin cando era dobre sesión que era moi duro. O adestrador está satisfeito co meu rendemento no campo. Esíxome o mesmo. Estar tanto tempo sen xogar dáme a motivación dobre para poder mostrar á xente que quero estar aquí, quedarme o tempo que poida, e dar alegría á xente. Non vou fallar á xente que me trouxo aquí".
Por conseguinte, "son consciente do que teño que facer aquí. É unha nova etapa para min o Dépor, unha nova oportunidade para a miña carreira, para a miña familia. Antes debemos ter a seguridade de poder xogar sen risco, ben de saúde".
Insiste en que a presión do Deportivo por saír das posicións de descenso é inherente ao fútbol profesional, onde "hai presión constantemente. Dáme tristeza ver o grupo que o Dépor ten, a súa calidade, e estar nesa situación. Comparado con outros equipos de Segunda, o Dépor non merece estar aquí, de verdade".
