Bernardo Tapia, que esta tarde dirixiu ao equipo desde o banco do Dépor en substitución do sancionado Natxo González, afirmou na sala de prensa de ABANCA-RIAZOR que o triunfo ante o CF Reus "dános moita satisfacción, unha alegría importante porque seguimos un refacho moi bo en casa. Isto ao final dáche a tranquilidade de facer forte o estadio, que era unha das premisas que nos marcamos ao principio".
Do encontro, o técnico deportivista subliñou que "saímos moi enchufados, conseguimos o gol moi pronto. Os primeiros 20 minutos dificultámoslles moito a saída, puxémosllo francamente complicado. A partir de aí, o contrario tamén xoga, ten nivel, asóciase ben; e a pesar de que conseguimos bastantes roubos no seu campo, tamén conseguiu saír nalgunha ocasión. E iso xérache que haxa espazos ás túas costas e póidache dar algún susto".
Explicou a entrada de Pedro Sánchez no once inicial, após quedarse por exemplo fóra da convocatoria o pasado sábado en Córdoba, porque "é un cadro tan competitivo que calquera xogador está en disposición de xogar. O interesante é mantelos a todos vivos porque o campionato vai ser moi longo, son 42 xornadas durísimas; e porque o traballo diario tamén é moi importante".
Pola súa banda, Xavi Bartolo, adestrador do CF Reus, indicou que "o principio do partido foi moi negativo para nós. Ante un rival desta entidade, encaixar o primeiro gol tan rápido condicionou o resto do partido".
Cre o técnico reusista que "na primeira parte o Deportivo foi moi superior. Pareceume un equipo que a nivel individual estaba moi por encima do noso nivel".
Tralo descanso, queixouse do segundo tanto deportivista, "que igual é fóra de xogo". A partir de aí, subliña Xavi Bartolo, "tentamos cambiar todo o plan, adaptarnos a ver se podiamos ter algunha opción. E é certo que polo que sexa, na parte final do partido tivemos 5 ocasións de gol que tampouco é tan fácil telas contra un rival como o Dépor".
