Celso Borges atendeu aos medios de comunicación esta tarde na sala de prensa de Abegondo.
O internacional costarriqueño asegurou que "estamos moi esperanzados" de cara ao choque deste sábado 14 de abril en San Mamés ante o Athletic Club (20:45, Bein LaLiga): "Son as cousas que dan as vitorias. Tráenos moita motivación. Fainos aínda mellor día a día no vestiario. Imos cunha moi boa actitude", advirte.
Espera un encontro ante os branquivermellos no que "poidan máis nosas ganas, o noso bo fútbol á hora de afrontar este partido. Pero que non vai ser fácil, iso é seguro".
Prefire centrarse no partido do Dépor e esquecer o do resto de rivais (Levante ou Las Palmas): "É o lamentable dunha situación así é que aínda gañando tes que esperar a ver que pasa noutro lado. De aí o que podemos controlar é o noso xogo e ver como podemos sacar puntos. O outro se escapa dentro do que quixésemos controlar".
A pesar desta situación difícil, encara a recta final "como temos que velo, cun positivismo que nos deixe adestrar todos os días con moito valor, con moita coraxe. Sabemos que a situación non é o ideal pero non podemos facer nada co que a xente queira pensar ou non. Temos que transmitir esa boa enerxía e ese positivismo dentro do campo".
Por este motivo, o obxectivo para o mediocentro deportivista é fácil: "Temos que seguir gañando para seguir metendo presión. É o que temos que facer. A situación é así de clara. Temos que puntuar e esperar".
A nivel individual, Borges recalca que afronta o que resta de temporada "como un profesional. Preparado para cando se de a situación de xogar".
Non crea que esta campaña sexa atípica para el, con menos tempo sobre o céspede: "Conto con minutos, con confianza e comportándome como tería que ser cada profesional, adestrando ao máximo".
