Celso Borges, un dos capitáns do primeiro equipo, pasouse pola sala de prensa de Abegondo esta mañá, nada máis finalizar o adestramento matinal.
Asegura que a clave desta temporada está na unión: "A forza de calquera equipo está na cohesión de todos os seus xogadores. Aí é onde vai estar a clave".
Por este motivo, máis aló de fichaxes para reforzar o cadro nestes últimos días do mercado de verán, "que diso se encarga a administración deportiva, correspóndenos facernos fortes entre nós e levar a cabo esta temporada dunha boa maneira, levarnos ben entre todos e que iso se vexa no campo".
O internacional costarriqueño cre que é importante despois da primeira derrota ligueira, "manter o ánimo arriba e manter unha actitude correcta nos adestramentos, como foi hoxe".
Precisamente do partido ante o Real Madrid, Celso Borges advertiu que "temos que estar máis enchufados en situacións mortas do partido. Temos que estar máis vivindo o partido. Son cousas que facendo nós unha autocrítica persoal, podemos melloralo".
No entanto, recalca que o equipo saíu reforzado do debut ligueiro: "Está a verse que temos un orgullo deportivo, que queremos gañar, que non nos importa quen teñamos enfronte, que imos tratar de impornos. Unha das virtudes do éxito dunha temporada é que ao equipo véxaselle xunto, véxaselle unido, e que teña unha actitude avasalladora durante os noventa minutos".
Preguntado por dous compañeiros, a meta Rubén e o dianteiro Florin Andone, o mediocentro deportivista teno claro: "Para min Rubén é un porterazo e Florin un superdelantero". Subliña que "da nosa parte teñen o noso apoio e sei que da afección tamén. Agora cando empecemos a gañar partidos, reforzaralles bastante".
