Borja Jiménez manifestou esta mañá en rolda de prensa que o resultado de 7-1 ante a SD Ponferradina do pasado mércores en Vilalba, na terceira cita da Dépor Xira Integral Motion 2022, non ten "ningunha importancia porque por desgraza non vale puntos. Pero é verdade que durante as pretemporadas o que se busca é ter boas sensacións, independentemente dos resultados; e vendo que o equipo vai facendo cada vez máis cousas, nese aspecto o outro día o equipo estivo ben. Pode ser que no que queda de pretemporada perdamos algún partido".
Insiste o técnico deportivista en que ese marcador fronte a un equipo de superior categoría e que ademais arranca a competición a próxima semana "non vai supoñer nada. O que temos que ver é que o equipo segue crecendo. Contamos cunha base importante de xogadores que xa estaban connosco o ano pasado, que iso che axuda a ter moitos automatismos, a ter un coñecemento nós moi amplo do que pode dar o xogador e eles do que queremos como corpo técnico. Iso axuda a que esteamos nun punto da pretemporada un pouco máis avanzado do normal porque moitos xogadores xa saben o que imos buscar, independentemente dos sistemas".
"Non ten ningunha transcendencia (o marcador) máis nada que fixémolo ante un rival de categoría superior e aos futbolistas axúdalles un pouco para ver que o nivel que van collendo é alto. Nada máis", conclúe.
Así pois, o adestrador branquiazul móstrase "contento por como está a ir a pretemporada, por como están a saír as cousas, por todo".
Preguntado polo futbolista coruñés Lucas Pérez, opina que "podería ser un xogador que nos axudara moito. El ten contrato con outro equipo, témolo que respectar. Temos que escoitar tamén a todas as partes: ao Cádiz CF, ao Club, ao xogador... A ver que se pode facer. Non é algo do que teña toda a información, pero é posible que se estea tentando. Cando existen os rumores, algo de verdade terá".
Coa última chegada de Rubén Díez, cre que "incorporaremos algo máis. Non moito máis, pero si algo máis. Hai que esperar un pouco a ver que cousas vainos dando o mercado. O do dianteiro temos claro que necesitamos ese posto específico como tal, independentemente de que o poida facer Quiles aí, que o fixo o ano pasado. Cremos que o posto de Quiles ou a situación no campo que tivo o ano pasado foi moi boa para el polos seus números e polo seu rendemento. A priori tentamos buscar a alguén que igual que o está facendo agora Gorka moi ben póidanos dar iso para non ternos que ver obrigados a mover a Quiles de sitio. E logo haberá que ir vendo tamén determinadas circunstancias, ir coñecendo todo o que temos e ver onde poden estar as nosas limitacións. Haberá que esperar, pero non imos facer só o dianteiro porque creo sinceramente que hai algunha liña onde imos un pouquiño máis descompensados. Entón haberá que esperar o momento e poder facelo".
Asegura que "non hai prazos marcados. Se hai que esperar esperarase e se atopamos unha opción de mercado que nos guste, farémolo. Non nos marcamos unha data como tal de dicir até tal día ou senón outra opción. Temos que ter paciencia e tentar atopar o que estamos a buscar, que xa sabedes por onde vai todo".
Así mesmo, en canto a Dani Barcia, agora en disciplina do Fabril, Borja Jiménez aclara que "é un tema que non podo comentarvos moito porque é unha decisión da Dirección Deportiva por cousas ou determinados comportamentos que viron durante a pretemporada, quizais non só en Dani. Iremos vendo como vai avanzando todo".
Tampouco quixo valorar os problemas extradeportivos que atravesa o DUX, primeiro rival do Dépor na liga en ABANCA-RIAZOR o próximo 27 ou 28 de agosto: "Coñezo parte porque teño relación de amizade con Alfredo e falei con el estes días e durante durante o verán. Considérolle unha persoa das que hai que atoparse no mundo do fútbol e que che vai achegando cousas. Son situacións persoais, neste caso do Club, e xa explicou el como está a situación. Eu desde aquí non podo facer nada máis. É unha faena que teñamos casos como este, pero non sei ata que parte é culpa do Club, da competición... É un tema sobre o que non podo facer ningunha valoración porque o único que sei é un pouco o que lin e o que falei con Alfredo".
Finalmente, reitera sobre Héctor Hernández, con traballo personalizado estes días, que "non se me comunicou nada (desde a Dirección Deportiva). É un xogador máis do cadro, con contrato e desexando que se poña ben e que poida adestrar".
