RCD / NOVAS

Borja Jiménez lembra que o partido de ABANCA-Balaídos "é a primeira das dez finais e queremos gañala"

25/03/2022 18:11

Borja Jiménez confía en que, con Trilli e Víctor fóra do grupo, Diego Villares poida estar en condicións para o partido deste domingo 27 de marzo ás 12:00 en ABANCA-Balaídos ante o RC Celta B (Footters, TVG-2 e G24.gal) aínda que advirte que "vai depender un pouco da súa evolución. Recibiu o outro día un golpe no pé que lle molestou".

Ten a favor que, tal e como subliña o técnico deportivista, tanto o futbolista lucense como o resto de compañeiros con problemas físicos "queren participar. Van querer estar desde o inicio e farán un esforzo por estar. Son 10 finais, é a primeira e queremos gañala. Temos que ir vendo como evolucionan. Se non, buscaremos outra alternativa como fixemos durante todo o ano. Fíxoo Lapeña no seu día, traballamos con Doncel... Hai que buscar alternativas a esa posible ausencia. Iremos valorando. Quedan aínda moitas horas, 48, para que se xogue o partido. Haberá tempo para decidir como facelo".

Cre que o encontro pode ser un partido aberto "por como entendemos os dous equipos o fútbol, a que altura levamos nosas defensas. É un pouco o que teño en mente, daquela isto do fútbol nunca se sabe. Igual que foi o partido da ida, con situacións de gol, con transicións, creo que pode ir un pouquiño por aí. Non sei moi ben a idea que poden ter eles, se van cambiar algo ou non. Xa sabedes que moitos equipos cando veñen connosco cambian a súa forma de xogar. A ver cara a onde nos leva o partido, pero a priori é un partido aberto".

Sen Miku, lesionado, lembra o adestrador branquiazul que se xuntou a baixa do dianteiro venezolano "coa ausencia de Noel. Pero durante o ano utilizamos a Quiles aí. É unha posición que el coñece, onde sempre comentou que está a gusto, ou sexa que non hai problema. E ante iso, diferentes alternativas se buscamos cousas distintas, como poden ser Doncel, Menudo... outro perfil de xogador se buscásemos algo diferente, pero tampouco vou dar moitas pistas".

En calquera caso pensa que a de Miku é "unha baixa importante para nós porque os que foron os nosos dianteiros durante todo o ano non están, os que foron nosos laterais durante todo o ano tampouco están. Temos que facer un pouquiño de encaixe de palillos nesas situacións, pero confío ao cento por cento de que imos gañar".

Non se atreve a prognosticar a que equipo beneficia máis xogar en ABANCA-Balaídos en lugar de en Barreiro: "Un campo en bo estado, aínda que Barreiro tamén o adoita estar, vai beneficiar ao espectáculo, que é un pouco o que se busca sempre neste deporte, que haxa espectáculo, que sexa divertido e que o espectador poida gozar. Canto mellor sexan as condicións, mellor, independentemente do campo".

Do RC Celta B, Borja Jiménez lembra comentar na previa do partido de ida "as armas que tiña. É un equipo con xogadores de talento como todos os filiais; pero eles teñen xogadores de talento con xogadores como Álex, Castro que veñen de Segunda División, de xogar o ano pasado vintetantos partidos os dous. Pampín coñece perfectamente a casa e terá moitísimos partidos en Segunda B, Carbonell, Alfon... Son xogadores que xa levan tempo na casa ou que teñen experiencia, aínda que sigan sendo novos".

Por conseguinte, alerta que "non nos imos a atopar un filial ao uso nese aspecto, é dicir, de xente moi nova que é a súa primeira experiencia na categoría, que nunca xogan en categorías superiores e que poidan pagar esa inexperiencia ao longo do ano. Habemos visto que non. Habemos visto que é un equipo que se mostrou bastante fiable durante todo o ano, que até estas dúas últimas semanas estaba a facer unha segunda volta moi boa, con resultados moi avultados, con bo xogo e que nos vai a poñer as cousas moi difíciles. Non creo que vaiamos vivir un partido como o da primeira xornada porque os dous equipos evolucionamos porque os dous buscamos unha percepción do xogo moi parecida e que vai ser complicado, pero como cada partido de aquí ao final".

Máis novas de: BORJA JIMÉNEZ