RCD / NOVAS

Bóveda advirte que o luns "nos imos a atopar un partido moi parecido ao que poden ser os play off"

23/05/2019 20:16

Eneko Bóveda manifestou esta mañá en rolda de prensa que "a lóxica di que todas as nosas posibilidades pasan por gañar os 3 partidos. Tería pouca volta atrás non sacar un bo resultado este luns" en ABANCA-RIAZOR ante o Real Mallorca (21:00 horas, GOL e LaLiga 1|2|3 TV).

Por conseguinte, o defensor deportivista cre que no vestiario "maioritariamente estamos con esa sensación de urxencia, de falar de finais. Pero xa desde a semana pasada, ou a anterior ou a anterior da anterior. Eu tentei transmitir un pouco a sensación de que xa estabamos en play off, de que había que gañar, gañar, gañar e gañar porque xa era a previa dos play off. É a forma de afrontala. Agora se cabe con menos marxe de erro".

Asegura que, aínda que o equipo non foi capaz de encadear durante a temporada 3 vitorias seguidas, "é o momento de facelo. Alá imos. Ao final pensar no Elche CF non nos vai a axudar a gañar ao Mallorca. O ideal para afrontar este partido é ter moi claro quen é o Mallorca, quen van xogar, como xogan. Estar pendentes de nós tamén, de ter unha boa semana. E ter presente que é gañar ou gañar".

Recoñece Eneko que "no último partido para a xente que foi alí (ao Anxo Carro) con toda a ilusión foi un trompazo e custou levantarse diso; incluso moita xente golpeando a tele vendo o noso partido. Pero despois vén outra oportunidade. De momento non estamos descartados a nada. Ninguén nos di que en 5 semanas todos esteamos abrazados e saltando. Tampouco me parece unha opción lóxica tirarse do barco agora".

En relación ao horario do partido, o luns 27 pechando a xornada, o defensor vasco, un dos futbolistas máis experimentados do vestiario, insiste en que "toda a atención que se desvíe do noso partido non nos vai a axudar. Sendo conscientes de que tes hoxe en día a aplicación de LaLiga, mil páxinas de internet para ver os resultados en liña, é o partido televisado; e é difícil abstraerte de algo que che incumbe tanto. Pero se imos ser prácticos, o mellor é estar o menos pendente posible deses partidos, pensar no Mallorca, que podo facer, como me gaño o posto para xogar contra o Mallorca, que indicacións me da o míster... e así se gañan os partidos. Non se gañan vendo ao resto".

Precisamente cualifica ao conxunto balear como "un rival directo, con moitísima vantaxe sobre nós tendo en conta o que queda de liga. Non creo que eles estean relaxados, nin pensando que pase o que pase contra o Dépor non pasa nada. Ímonos a atopar un partido moi parecido ao que poden ser os play off. Sendo verdade que a súa situación é moitísimo mellor que a nosa. Tentaremos recortarlles esa vantaxe e xornada a xornada verase o que vai pasando".