Desde este ano, os DéporCampus, que mobilizan a máis de 2.000 nenos e nenas, terán como patrocinador principal a Cabreiroá. Ignacio Rivera, CEO de Hijos de Rivera, e Tino Fernández, presidente do Real Club Deportivo, presentaron hoxe este programa deportivo que reforza a vinculación das marcas de Hijos de Rivera co Dépor e a aposta de Cabreiroá polo deporte de base, neste caso a través dos DéporCampus.
Tras a presentación, Ignacio Rivera manifestou que "Cabreiroá reforza o apoio aos DeporCampus como programas deportivos que fomentan o deporte e hábitos saudables entre nenos e nenas deportivistas”. Pola súa banda, Tino Fernández afirmou que "estamos moi agradecidos a Hijos de Rivera polo seu apoio decidido e constante ao Real Club Deportivo e neste caso concreto aos DéporCampus Cabreiroá. Esta actividade é o claro exemplo da nosa política de responsabilidade social e de fomento do deportivismo. Nas nosas instalacións, onde adestran todos os nosos xogadores, acollemos durante máis dun mes a nenos e nenas que teñen ilusión por ser futbolistas pero sobre todo por gozar dun verán diferente e pasalo ben nos campos do equipo da súa cidade. É, seguro, unha experiencia Dépor irrepetible e inesquecible para todos eles".
Os DéporCampus Cabreiroá son mixtos e impartidos por adestradores do Real Club Deportivo. Os obxectivos son, tanto para xogadores como para porteiros, ensinar as habilidades e conceptos en relación co opoñente e co compañeiro, pero, sobre todo, transmitir os valores de respecto, solidariedade, xogo limpo, amizade, integración, e esforzo.
Os DéporCampus Cabreiroá creceron de forma exponencial desde a chegada do actual consello de administración do Deportivo. Dun campus cunha única sede e menos dun centenar de nenos e nenas en 2013 pasáronse ás actuais 11 localizacións. Este verán estréanse 4 sedes: As Pontes, Santiago, Ordes e Zas, que se suman ás xa existentes en Abegondo, Viveiro, Rianxo, Bertamiráns, Ferrol, Monforte e Xenebra. Na edición 2016 dos DéporCampus Cabreiroá participaron 1.548 nenos e nenas (deles 1.068 en Abegondo). Este ano, a sede central na Cidade Deportiva do Real Club Deportivo pasa de 3 a 5 semanas de actividade (a última de xuño e todo xullo), polo que a previsión é superar os 2.000 participantes.
Desde esta edición 2017, toda a xestión dos DéporCampus Cabreiroá realízase a través da nova páxina da actividade: deporcampus.rcdeportivo.es. Nela pódese atopar toda a información común a todos os DéporCampus Cabreiroá e específica dá cada unha das sedes.
