Carles Gil e Gerard Valentín, os dous últimos reforzos do Deportivo, estreáronse esta mañá en Abegondo, ás ordes de Pepe Mel.
Ao acabar a sesión, o técnico deportivista citou a 23 futbolistas para o primeiro amigable deste verán, esta tarde ás 19:30 no campo da Magdalena de Villalba, ante o Racing Villalbés.
A directiva do Racing Villalbés fixou en 5 euros os prezos das entradas para o público.
Ademais de Carles Gil e Gerard Valentín, quedaron fóra desta lista os lesionados (Fede Cartabia e Borja Galán) e os internacionais (Celso Borges, Fayçal Fajr, Andone e Çolak) e Juan Domínguez, que hoxe cumpren o seu segundo día de pretemporada. Todos eles adestraranse en Abegondo ás 18:00 horas.
Entrou na convocatoria Luisinho, que esta mesma mañá recibiu a alta médica.
A sesión de hoxe foi fundamentalmente táctica, no campo 2, para os futbolistas que xogarán ante o Racing Villalbés. Os demais tiveron rondos e accións combinativas de ataque.
Mañá venres 14 de xullo, o equipo adestrarase na cidade deportiva ás 10:00 horas.
