Carles Gil manifestou esta mañá na sala de prensa de Abegondo que os futbolistas branquiazuis "sabemos o que temos que facer, sabemos que só nos valen os tres puntos. E é coa idea que imos a Vilarreal", este domingo 14 de maio no Estadio de la Cerámica (20:00, Bein Sports).
O atacante deportivista asegura que "temos a sorte de que unha vitoria nos salva. Non dependemos de ninguén, dependemos de nós mesmos. Xa metidos onde estamos, é a mellor situación".
Sobre o seu estado físico, advirte que "me atopo mellor. Tiven momentos de molestias que me impediron estar ao cento por cento. Afortunadamente atópome mellor".
Do Villarreal apunta que "xa leva moitos anos demostrando o equipo que son, o club que é. Fixeron as cousas moi moi ben desde que ascenderon de Segunda. Teñen xogadores de moitísima calidade. Sabemos que lles gusta moito ter o balón, son xogadores moi asociativos. Teñen un cadro moi amplo. Sabemos que vai ser un partido moi difícil pero que imos ter as nosas opcións".
A pesar da entidade do conxunto castellonenco, subliña que "é un partido onde nos estamos xogando a vida. Por tanto temos que ir a por eles e xa está".
Despois dos últimos resultados do equipo, Carles Gil indica que "entendemos que a xente perdese confianza. Se non ganas, a xente pérdea. O importante é nós. En Pamplona, a pesar de como se deu o partido, estivemos a piques de gañar. Cada partido é un mundo. O que hai que facer é esquecernos de todo o que pasou na temporada e centrarnos unicamente no partido de Vilarreal. É un equipo moi difícil porque xoga moi ben, pero é un equipo ganable. Se facemos as cousas ben e sabemos por onde facerlles dano, imos ter as nosas opcións".
Insiste o '11' branquiazul a estas alturas da temporada "en esquecernos de todo o que pasou atrás e centrarnos só neste partido. Se para a partido clave que tes estás a pensar no mal que nos foi todo... Como xa o sabemos, imos esquecernos diso e centrarnos neste partido. E xa está".
Carles Gil sostén que non estará pendente do resultado do Sporting de Gijón en Eibar, un partido no que se non gañan os asturianos, suporía matematicamente a permanencia do Dépor: "Só ao final do partido, se desgraciadamente témolo que mirar. Esperemos que non nos teña que importar ese resultado e poder dicir que puidemos conseguir a salvación e encima gañando nun campo tan difícil".
