RCD / NOVAS

Carlos Fernández asegura que "a afección se envorcou. Transmitiume moitísimo"

10/09/2018 20:32

Carlos Fernández, que debutou onte coa camiseta do Deportivo, pasouse esta mañá pola sala de prensa de Abegondo.

O dianteiro sevillano marchouse do encontro ante o Sporting de Gijón "con boas sensacións". Recoñeceu que "polas lesións dos compañeiros acelerouse o proceso de xogar. Atopeime ben. O meu último partido foi en maio. Logo pasei a lesión. Estou lonxe do meu máximo nivel. Pero atopeime fisicamente mellor do que esperaba. Gañar é importante e fai que todo pareza mellor. Contento por vestir por primeira vez a camiseta e ilusionado por todo o que nos queda".

Non ten dúbidas sobre a acción do penalti cometido sobre el no transcurso da primeira metade: "Entro na área, cámbiome ao perfil dereito que quizais é menos habitual. Noto o contacto aí, derrúbame e logo o colexiado interpreta que é penalti e pítao. Vin a xogada repetida e ségueme parecendo penalti aínda que podo entender que haxa xente do outro equipo que está no seu papel e proteste. Pero para min foi penalti".

Cre que os 3 puntos de onte ante o Sporting de Gijón foron "merecidos. Fomos superiores todo o partido. Ao final fíxose xustiza". "Eles non tiveron ningunha ocasión. Nós tivemos o dominio do balón, tivemos as ocasións. Desde o primeiro minuto até o último fomos dominadores e é xusta a vitoria", engadiu.

Tivo palabras de agarimo para a afección: "Sorprendeume moito o ambiente. A afección envorcouse, transmitiume moitísimo. É importante que se consigan vitorias, que a xente estea enchufada sobre todo por eles, que son os que moven o día a día de nós. Merécense o mellor".

A pesar da súa xuventude, Carlos é bo coñecedor da categoría. Por este motivo advirte que "sempre que se gañe e que se puntúe moito mellor. Esta liga é moi longa, é unha carreira de fondo, unha carreira de regularidade. Imos no camiño. O importante é facer bos partidos, atoparnos cada día con mellores sensacións, adaptarnos ao sistema novo, ao míster novo, a novos compañeiros que viñemos novos. Se ese proceso vaise logrando con vitorias, moitísimo mellor".

Ante a Copa do Rei deste mércores 12 de setembro en La Romareda (21:00 horas, Gol), o dianteiro branquiazul apunta que "avanzar en calquera competición é bo. Temos un cadro amplo e para a xente que aínda nos falte un pouco de ritmo e para compañeiros que non están a ter moitos minutos neste comezo de temporada é bo que haxa outra competición para seguir collendo ritmo e forma. Sempre que se gañe e sexa para sumar e para gañar confianza é bo. Neste caso a Copa do Rei é unha competición prestixiosa".

Define ao conxunto zaragocista como un equipo "forte na casa. Entre semana non ten tanto público pero eles apertan na súa casa. Teñen a necesidade de gañar igual que nós. Vai ser un partido bonito, disputado".

Máis novas de: CARLOS FERNÁNDEZ