Foto: - www.sefutbol.es -
O dianteiro do Deportivo Carlos Fernández estivo concentrado estes días coa selección española sub-21 para 2 partidos amigables.
Hoxe luns 19, España visitou a Francia, nun encontro que se xogou no Estadio Michel D'Ornano en Caen (1-1). Foi a última cita do ano para a sub-21 española, que prepara así o Campionato de Europa do ano próximo.
Carlos foi suplente e saltou ao campo no minuto 90, en substitución de Fabián.
O equipo dirixido por Luis de la Fuente mediuse en primeiro lugar o pasado mércores 14 de novembro (4-1) nas Gaunas (Logroño) a Dinamarca.
O ariete branquiazul entrou ao partido no minuto 67 por Dani Olmo.
Por este motivo, Carlos Fernández perdeuse o LXXIII Trofeo Teresa Herrera do pasado mércores no Estadio ABANCA-RIAZOR ante o Athletic Club e non estivo tampouco no partido de LaLiga 1|2|3 correspondente á 14ª xornada do Deportivo en Almería de hoxe luns 19 de novembro (1-1).
O futbolista sevillano chegará mañá martes á Coruña para incorporarse o mércores aos adestramentos co Dépor en Abegondo.
Dous goles do fabrilista Pedro deron onte a vitoria a Portugal sub-20
O dianteiro do Fabril Pedro Correia finalizou onte domingo a concentración coa selección portuguesa sub-20 despois de disputar tres partidos amigables, todos eles en territorio luso.
Por este motivo, o canteirán branquiazul non estivo dispoñible para Sergio Pellicer na cita do Fabril, en Abegondo ante o Las Palmas Atlético.
O último compromiso para Pedro nesta rolda de partidos foi ante Eslovaquia (2-1), onte domingo 18 no Estadio de Portimão.
O ariete fabrilista saltou ao campo no minuto 61 en substitución de Mickael Almeida con empate sen goles. A súa actuación foi decisiva, ao marcar os dous tantos de Portugal (minuto 72 e 79), definitivos para dobregar aos eslovacos, que recortaron diferenzas no 89.
O pasado venres 16, o combinado luso mediuse tamén a Eslovaquia no Estadio Municipal Bela Vista na localidade de Parchal.
Gañou tamén Portugal (3-1), esta vez con Pedro no banco. Daniel Bragança, Leandro Cardoso e Nuno Santo foron os goleadores portugueses.
No primeiro do tres amigables, Portugal recibiu o pasado xoves a Polonia no Estadio Algarve de Faro.
O canteirán deportivista foi titular no triunfo do seu equipo (2-0), con tantos de Elves Baldé na primeira metade e Leandro Cardoso na recta final do choque.
