Carlota e Laura Rivas destacan no triunfo de Galicia sub-17 ante Castela e León
As xogadoras do Deportivo ABANCA B Carlota Sánchez e Laura Rivas disputaron con Galicia sub-17 no campo de Santa Isabel (Santiago de Compostela) a Primeira Fase do Campionato de España de seleccións territoriais.
Hoxe domingo, fronte a Castela e León, no partido que pechou esta Primeira Fase, impuxéronse as galegas (3-0), de novo con actuación destacada das dúas futbolistas do Deportivo ABANCA B.
Ambas foron titulares. Laura Rivas xogou completo o choque e estrelou un disparo no traveseiro. Carlota, que raiou a gran nivel, anotou o primeiro gol e levou en todo momento o mango do xogo galego. Foi relevada no minuto 87 e o público despediuna cunha gran ovación.
Na primeira cita, o pasado venres ante Estremadura, as dúas futbolistas branquiazuis tamén formaron no once inicial. Carlota ademais foi a autora dun dos goles galegos (0-2) que serviron para amarrar o triunfo.
Iso si, as estremeñas non o puxeron fácil e chegaron a fallar 2 penas máximas.
Así pois, Galicia acaba esta Fase con pleno de puntos: 6 de 6 posibles.
Os resultados das galegas foron os seguintes:
Venres 14 de decembro ESTREMADURA 0 - GALICIA 2
Domingo 16 de decembro GALICIA 3 - CASTELA E LEÓN 0