O pasado venres 10 de xuño celebrouse a presentación do DéporCampus Cabreiroá de Cee, que se realizará na localidade costeira a última semana deste mes de xuño.
Esta será a segunda edición deste campus despois do éxito da Escola RC Deportivo na comarca e do convenio a tres bandas entre o concello de Cee, as Escolas Luis Calvo e a Fundación RC Deportivo co que se desexa seguir achegando aínda máis o Dépor e o deportivismo á Costa da Morte.
Á presentación, que tivo lugar no consistorio ceense, acudiron Margarita Lamela, alcaldesa de Cee; Juanma Buiturón, concelleiro de deportes de Cee; Ramón Iglesias, presidente da Unión Club Cee, e Pablo Barros, director das actividades formativas da Fundación RC Deportivo.
A actividade está destinada a nenos e nenas desde os 6 aos 14 anos e terá un horario de 10:00 a 14:00 horas entre os días 27 de xuño e 1 de xullo. O escenario será o campo de San Paio de Refoxos.
Os interesados poden consultar toda a información da sede de Cee e realizar o proceso de inscrición até as 12:00 do xoves día 23 de xuño nesta ligazón.
Para calquera dúbida ou consulta coa súa inscrición, os interesados poden contactar directamente coa organización na dirección de correo electrónico deporcampus@rcdeportivo.es.
