Un dos goleadores do Dépor no que vai de temporada, Christian Santos, pasou esta mañá pola sala de prensa de Abegondo, minutos antes de que comezase o adestramento diario do equipo.
O internacional venezolano confesou sentirse a nivel físico "bastante ben. Tiven a oportunidade de facer case toda a pretemporada, o que o ano pasado, pola lesión, non se me deu. Síntome moi ben".
Cre que está preparado para ser titular e alegrouse por "ter a sorte de marcar nos dous primeiros partidos. E iso sendo suplente. Para un dianteiro é algo que desexas, entrar e poder marcar. Feliz por facer iso".
Apunta que tenta "levar da mellor maneira" marcar goles e empezar no banco o seguinte partido. "Gustaríame ter máis minutos, que é cando tes boas prestacións. Pero non son eu o que decide, senón o míster. Entón hai que ter tranquilidade, manteño a tranquilidade, sigo traballando duro para ter esa oportunidade", apunta.
Sobre como viviu o verán, Christian Santos asegurou "dicir sempre que me gustaría quedar. E quedeime, así que estou feliz de afrontar este ano co Dépor. Está claro o obxectivo que temos, dar o mellor de nós". "Non souben nada (de ningunha oferta) até o peche do mercado de fichaxes. Estaba soamente enfocado en adestrar ben, en facer as cousas ben e até agora foi así", conclúe rotundo.
Do encontro deste domingo 15 de setembro en El Molinón ante o Sporting de Gijón (21:00 horas, Gol), o dianteiro deportivista lembra que a temporada pasada marcou un gol: "Teño bos recordos. Sempre que xoguei aí marquei. Espero poder marcar a fin de semana", desexa.
Preguntado polo arranque ligueiro do Dépor, con 3 derrotas consecutivas, advirte que "é cedo aínda. Tivemos o último día 5 fichaxes. Ou sexa, que agora hai que ir axustando a todos, e aos poucos formar equipo, que é o importante".
A xuízo de Christian, o obxectivo do equipo esta temporada é ir "partido a partido. O que importa é Xixón e levar os 3 puntos. E a partir de aí o próximo".
Por conseguinte, non lle gusta falar de ascenso: "O ano pasado falouse moito e non se conseguiu nada. Un desexa o ascenso pero primeiro hai que facer as cousas ben; e despois poderá un soñar".
Do partido do Albacete do pasado sábado en ABANCA-RIAZOR, Christian queda con que o equipo non recibiu goles en xogada, "aí estamos a mellorar. Hai que coller a dinámica, os movementos de cada xogador".
Nesta liña, indica que "defensivamente xa estamos mellor, atopámonos mellor, e esa é a base. A partir de aí necesitamos paciencia no ofensivo, acertar en decisións diante. Temos situacións de poder marcar pero fáltanos a decisión final de acertar ben. Se logramos iso podemos gañar o partido facilmente".