Dani Giménez, primeira fichaxe do Deportivo para a Temporada 2017-18, manifestou na sala de prensa de Abegondo, no seu acto de presentación, que "me atopei moito agarimo. Onte estaba a falar cun afeccionado e sorprendíame como falaba do equipo, da situación que se viviu este último ano, que non foi nada agradable. Eles están a pensar no ascenso e en encher Riazor. Para un xogador que chega novo, aínda que eu coñezo ben a cidade e o equipo, sempre supón un plus de alegría e de ilusión".
Acompañado polo Conselleiro Daniel Ramos e polo Director Deportivo, Carmelo del Pozo, reitera estar "moi contento por chegar". Conta que a negociación "foi bastante rápida porque as dúas partes queriamos que se producise pronto. En canto teño a posibilidade de vir ao Dépor, fago todo o posible por vir. Ás veces, a pesar de que non é a opción máis cómoda, hai algo que che di que vai ser o mellor sitio. Ademais é un plus que estea Carmelo. Confío moito no que el fai, na súa maneira de traballar, no día a día".
Malia non saber aínda o nome do adestrador, "nin llo tentei sacar" (a Carmelo), chancea Dani Giménez, "para min é un plus que estea aquí. Non me fai falta saber quen vén se el está aquí, sinceramente".
Neste sentido, apunta que a opción "para min máis cómoda tería sido quedarme en Sevilla, ou haberme ido ao estranxeiro ou a outras opcións de maior categoría. Valoro ao Dépor por encima doutros equipos que están agora en Primeira División e nós circunstancialmente estamos en Segunda. Como galego, como persona que segue o fútbol e que coñece este equipo desde que son pequeno, sei o que me pode achegar o Dépor a min e as ganas de volver á miña terra. Todo xogou un papel importante para vir aquí. Ás veces elíxese co sentimento e outras razóns déixalas apartadas. Non me vou a arrepentir. Carmelo tampouco se vai a arrepentir de traerme. Vou achegar moitísimo. A ilusión que teño é a dun neno malia que levo unha traxectoria e teño unha experiencia xa".
Ve con naturalidade compartir a súa condición de vigués de nacemento co seu agora deportivismo: "Nacemos nunha cidade e temos logo que desenvolver o noso traballo, a nosa vida. Haberá xente que lle poida gustar máis ou menos. Estou moi contento de vir aquí. Vouno dar todo polo Dépor, como sempre fixen ao longo da miña carreira. Confío moitísimo no que podo achegar ao equipo. Estou seguro de que se hai xente que non lles gusta onde nacín, cando vexa o meu compromiso, esqueceráselles".
Non teme á presión nunha posición, a de porteiro, que a temporada que agora conclúe tivo no Dépor até cinco ocupantes: "Veño dun Club (o Betis) no que os exames son a diario, até nos adestramentos. É unha presión bestial. Eu creo que coa miña forma de ser e co que aprendín nos últimos anos, levarei a situación ben. O que pasase antes da miña chegada a min realmente non me compete e seguramente non me afectará. Vou traballar no meu, teño moita confianza no que vou facer, no que vai facer o equipo. Estou seguro de que o Dépor vai pelexar polo obxectivo claro que é o ascenso. Todos os xogadores imos sumar para iso".
Figura importante no vestiario bético, subliña non obstante que "non creo moito nas figuras. Non creo que un equipo porque haxa unha figura cambie moito un vestiario. Ten que ser cousa de bastante xente. Cando van mal as cousas, ás veces achácanse a problemas de vestiario... Ás veces as cousas saen ao revés, méteste nunha situación moi difícil de saír, moi crítica, con falta de confianza; e si necesitas o empuxón de certos compañeiros para que vexas que vales máis do que estás a demostrar. Eu son dunha maneira. Sempre tento axudar ao compañeiro, tentei que a xente que traballe connosco, a xente de Club, que estea cómoda co equipo. Sendo unha piña, sendo unha familia, conséguense mellor os obxectivos. Se ti lévaste ben con quen traballas, vas traballar mellor. Ser líder falalo agora é bobada. Oxalá non faga falta ningún líder e todos vaiamos para arriba. Iso sería o ideal".
Márcase como reto persoal, "o mesmo do equipo. Evidentemente quero xogar todo, quero que non me metan gol en ningún partido e que o Deportivo suba a Primeira División. Vivo moito o día a día porque creo que o demais desgasta e non leva a nada. Marcareime cada día estar o mellor posible, axudar na categoría que me toque o máximo ao equipo. O obxectivo meu individual é o mesmo que do equipo, que é ascender".
Confesa que ten moitas ganas de ser titular no Dépor, "pero iso pasa en todos os equipos. Sempre fun competitivo, pero porteiro sempre xoga un. A maneira de ser honesto coa profesión é tentar traballar día a día o máximo que se poida e tentar estar en forma sempre. É unha posición que da noite para a mañá cambia todo na túa vida. Veño aquí para ser importante e para competir. O compañeiro que teño ao meu lado vai ter que traballar moito para superarme".
