Dani Giménez confesou na sala de prensa de Abegondo que non lle sorprende unha clasificación tan apertada na parte alta de LaLiga 1|2|3, con até 6 equipos separados por 5 puntos: "Sigo mantendo que quizais como cadro somos o máis compensado. Pero queda moitísimo. Ao final estamos a ver que é moi difícil gañar, hai moitos empates. Habemos visto que só perdemos un partido nun campo complicado pero empatamos moito. Ao final compénsase un pouquiño iso".
Lembra que "levamos un terzo de liga. Queda moitísimo e quedan ademais as xornadas máis complicadas, que é sobre todo o último terzo. O importante é estar aí e no último terzo de liga é onde se vai a ver o que cada equipo propón para subir".
Non se atreve a vaticinar o futuro ligueiro: "Non se sabe nunca o que vai pasar. Ao final segues unha boa dinámica en casa, melloras un pouquiño fóra e distánciasche un pouco. Pero creo que nos vai a custar porque hai moita xente metida. Cando o teu rival é 1 ou 2, poden ter un momento malo e sacarlles puntos. Pero cando os teus rivais son 4 ou 5 equipos que pasaron momentos malos e seguen estando aí..."
Do Zaragoza, rival este domingo 16 de decembro en ABANCA-RIAZOR (20:30 horas, Gol e LaLiga 1|2|3 TV), o porteiro deportivista non se fía da mala situación clasificatoria dos maños, porque "en calquera momento pode encadear 3 ou 4 vitorias e está aí outra vez. O importante é centrarse tanto individual como colectivamente no día a día, o partido a partido. Se deixas pasar as oportunidades, son puntos que custan".
Sobre o empate do pasado sábado ante o CD Numancia, Dani cre que "tampouco temos que volvernos tolos porque a dinámica do equipo é boa. Todos os equipos teñen partidos malos. Pasamos unha segunda parte mala; non chegou nin ao partido enteiro, e non perdemos. Cando un equipo como nós fai algo tan afastado do que adoitamos facer sempre hai que sacar o lado positivo".
Preguntado pola ausencia de Carlos Fernández, opina o meta branquiazul que "arriba temos unha gran variedade, xogadores distintos. É certo que Carlos está nun gran momento de forma e ten un gran potencial. É un xogador que me gusta moito. Gústame como traballa, como tenta crecer en cada partido. Neste caso xogou Borja, meteu un bo gol. Tamén hai que valorar o que fixo Borja en poucos minutos, con pouca continuidade. É un dos xogadores destinados a ser grandes no equipo". "Estou moi tranquilo porque é un luxo ter a xogadores como Borja, Christian, Fede, cando se recupere... que che poden achegar nin máis nin menos, senón algo diferente do que che pode achegar Carlos", engade.
