Dous equipos de #ANOSACANTEIRA, Deportivo ABANCA B e Xuvenil B, disputan mañá martes e o mércores partidos que foron aprazados no seu día por COVID-19.
Así, o encontro da 9ª xornada de liga no subgrupo A do grupo 1º de Primeira Nacional entre o Victoria CF e o Deportivo ABANCA B xogarase mañá martes 19 de xaneiro ás 19:00 no campo coruñés da Grela 1.
Ambos os equipos víronse as caras o pasado 20 de decembro, con motivo da VIII edición do Trofeo Teresa Herrera en ABANCA-RIAZOR. O resultado naquel partido foi de empate, resolto a favor das branquiazuis na quenda de penaltis.
O Deportivo ABANCA B busca recuperar o terreo perdido onte coa derrota fronte ao Umia CF no campo de Barrantes. As pupilas de Kevin Cabado son cuartas na táboa con 16 puntos, a cinco do líder, o Viajes InterRías FF que ten 21; e a dous puntos precisamente do Victoria CF, segundo con 18 puntos.
O Xuvenil B, en Abegondo o mércores
Pola súa banda, o encontro correspondente á 7ª xornada no subgrupo A da Liga Nacional entre o Xuvenil B e o Victoria CF celébrase este mércores 20 de xaneiro ás 19:45 en Abegondo (campo 3).
Os branquiazuis son líderes con 24 puntos e un partido menos xogado que a SD Compostela, segundo na táboa con 21 puntos.
