Quique González asegurou esta mañá na sala de prensa de Abegondo que estamos nunha semana, coa visita este domingo 10 de febreiro ao Granada CF (18:00 horas, Movistar Partidazo), "para gañar, para dar outro golpe na mesa como fixemos en Xixón; e con moitas ganas, tralo empate que tivemos en ABANCA-RIAZOR, de gañar, de conseguir os 3 puntos e de facer un bo partido. E así iremos a Granada".
A nivel persoal, con varias semanas sen ver porta, confesa estar "moi tranquilo. Cando marcaba goles non me volvía tolo, seguía traballando como o fixen sempre. Agora que non estou a marcar porque as estatísticas así o din, sigo tranquilo, traballando igual, máis se cabe, pero coa cabeza fría".
Insiste en que "hai que manter o equilibrio perfecto cando as cousas non saen tan ben. Levo moitos partidos nisto, sei como funciona. Estou tranquilo e con moitas ganas de poder axudar o domingo".
Conclúe que "o máis importante é o Deportivo, que o Deportivo gañe. Se podo axudar con goles ao equipo moito mellor, pero tamén hai xente que pode facer goles. O máis importante é gañar, traer os 3 puntos de Granada".
Precisamente preguntado polo recente mercado de inverno, destacou que está "moi a gusto aquí. O único que penso é ascender, gozar o momento. Pode ser unha temporada moi bonita. Aínda queda moito". "Preocupábame cero o mercado de inverno", concluíu.
Do conxunto nazarí, comenta o dianteiro deportivista que "ten moi bos xogadores, ten moi bo adestrador. Coñézolle do ano pasado en Osasuna. Teño boa relación con el. Todo o que lle pase bo, alegrareime moito por el. A el custoulle chegar onde está. A priori o Granada non era un equipo que estivese aí. Pero iso son as hipóteses, iso non sérveche de nada. O que si son os feitos. Desde comezo de temporada traballan como hai que traballar. E as cousas non saen da nada".
Destaca ademais que "teñen á afección con eles a tope. Saben que vai un equipo forte. Coñecen as súas virtudes e nós deles os seus defectos. O importante é ser eficaces nas áreas. Eles estudarannos, nós igual a eles. A ver o que pasa".
Con triunfo na primeira volta en ABANCA-RIAZOR, co que cun empate este domingo no Nuevo Los Cármenes suporía avantaxar ao Granada CF no golaverage particular, advirte non obstante que "imos gañar. Daquela o fútbol non sabes o que che pode deparar. Eses pequenos detalles de goles a favor, en contra, golaverage particular... nunca sabes se o vas botar en falta. Todos eses pequenos detalles hai que telos en conta porque suman".
O pasado sábado ante o CD Tenerife en ABANCA-RIAZOR, máis escorado a banda, comentou Quique atoparse "cómodo. O míster decide onde poñerche. Ti podes ser dianteiro, pero o míster decide. As escusas non valen para nada. Comigo non van. Encantado de xogar o outro día en banda. No momento que souben que ía xogar aí, facelo o mellor posible e axudar ao equipo. Son un máis e tentar sumar sempre".
Nesta liña, presume o futbolista branquiazul de que no Deportivo "podemos xogar con varios sistemas. Ao rival seralle máis difícil de contrarrestar. Iso é o importante, adaptarnos ben ao sistema que diga o míster e automatizar eses movementos, esa maneira de xogar que leva un ou outro sistema".
