Edu Expósito cualificou esta mañá na sala de prensa de Abegondo ao Real Oviedo, rival do Dépor este sábado 10 de novembro en ABANCA-RIAZOR (20:30, GOL e LaLiga 1|2|3 TV), como un equipo "moi duro, que sempre pon as cousas moi difíciles".
Xogar en casa, para o '21' branquiazul, fai que "o equipo senta moi cómodo. Tamén a afección axúdanos. Iso é importante e bo para o equipo e para min".
A nivel persoal, o centrocampista branquiazul, titular nos últimos partidos, confesa que sente "moi cómodo. As cousas están a saír ben e que sigan así".
Nesta liña, insiste en que "cada día me atopo mellor. Aínda faltan cousas. Pero estou a atoparme moi cómodo. Sempre me sentín como un máis no equipo", apostila.
Di non estar ansioso por marcar o seu primeiro gol, máis ben "tranquilo. Seguro que chegará".
Iso si, é consciente de que "todo hai que mellorar" no seu xogo. "Teño que seguir mellorando, seguir facendo o meu fútbol e seguir atopándome ben", engade.
Preguntado pola decisión do Comité de Competición de deixar sen efecto o segundo cartón amarelo que viu o dianteiro do Málaga CF Branco Leschuk en Pamplona a pasada fin de semana; ou da resolución do devandito Comité de castigar con só un partido de sanción tamén ao malagueño N'Diaye por ameazar a un rival, Edu Expósito opina que é "moi inxusto. Ao final nós non podemos facer nada. Non necesitamos que nos axude ninguén pero tampouco que nos prexudiquen".
O canteirán advirte que o vestiario fixo propósito de emenda coas expulsións por protestar ao árbitro: "Non podemos deixar ao equipo cun xogador menos".
