RCDeportivo RCDeportivo RCDeportivo
Skip to main content
GL
PORTADA

Elena Vázquez, á final do Europeo sub-17 o venres contra Francia

- Foto: @SEFutbolFem -

Elena Vázquez representa a #ANOSACANTEIRA no campionato de Europa sub-17 que se celebra estes días en Estonia.

A defensora deportivista tivo como rivais na fase de grupos a Alemaña, Suíza e a anfitrioa Estonia; e hoxe martes 23 de maio o combinado nacional disputou a semifinal ante Inglaterra, á que derrotou (3-1) con goles de Vicky López, Ainoa Gómez e Paula Comendador. Elena Vázquez non tivo hoxe minutos de xogo.

Así pois, a final do Campionato de Europa será o venres 26 de maio ás 19:00 hora local (18:00 en España, televisada por Teledeporte e Uefa.tv) no Lilleküla Stadium de Tallin ante Francia, que goleou (10-2) a Suíza na outra semifinal.

España pechou a primeira fase o pasado sábado 20 ante Estonia (6-0) no Estadio Lilleküla de Tallin, xa co billete a semifinais no peto.

Elena Vázquez debutou no torneo como titular, xogou todo o encontro e ademais anotou no minuto 62 o cuarto gol de España, cunha cabezada á saída dun córner.

A segunda cita no torneo para a canteirá branquiazul e as súas compañeiras foi o pasado mércores 17 de maio ante Suíza, que debutara con triunfo (0-4) ante Estonia na 1ª xornada.

Gañaron as hispanas (3-0), resultado que clasificou xa ao equipo que prepara Kenio Gonzalo para a seguinte rolda. Elena Vázquez non gozou de minutos de xogo.

O Europeo arrancou para a selección española o pasado domingo 14 de marzo no Estadio Kadriorg ante Alemaña, á que xa derrotara (4-0) na Ciudad del Fútbol nun amigable o pasado 12 de xaneiro.

Xa en competición oficial, as españolas volveron vencer (0-2) con dobrete de Vicky López. Nesta ocasión, Elena Vázquez tamén seguiu o partido no banco e non chegou a saltar ao terreo de xogo.

O calendario de España, cos resultados dos xa xogados, é o seguinte:

Primeira Fase
Domingo 14 de maio
ALEMAÑA 0 - ESPAÑA 2

Mércores 17 de maio
ESPAÑA 3 - SUÍZA 0

Sábado 20 de maio
ESPAÑA 6 - ESTONIA 0

Martes 23 de maio
Semifinais
ESPAÑA 3 - INGLATERRA 1

Venres 26 de maio
18:00 (19:00 hora local): ESPAÑA - FRANCIA, no Lilleküla Stadium de Tallin

Con 15 anos e con ficha do Orzán SD Cadete de Liga Galega, Elena Vázquez gañouse esta temporada unha praza de titular no Dépor ABANCA B, subcampión de Primeira Nacional, e xa debutou nun amigable co Dépor ABANCA de Primera Federación Iberdrola.