Emocionante regreso de Tere, que será protagonista este mércores na entrega de premios do Trofeo RC Deportivo
Tere Abelleira, que onte se proclamou subcampioa de Europa Sub-17 coa Selección Española, regresou esta tarde á Coruña.
Ás oito en punto desta tarde, unha representación do cadro do Deportivo Abanca (Perdi, Estefi, María Corral e Lía) afanábanse cos preparativos de benvida na terminal do Aeroporto da Coruña: inchado de globos brancos, escritura de mensaxes en cada un deles. "Estuda", rezaba nun. "Todo de bo rollo", dicía outro.
Pasados dez minutos das oito, o incansable sorriso de Tere Abelleira aparecía pola porta de saída da sala reservada aos viaxeiros. Colgaba do seu pescozo, orgullosa, a medalla de prata lograda tan brillantemente na República Checa, despois dun gran torneo no que só Alemaña foi capaz de dobregar ás españolas.
Ataviada coa indumentaria oficial da Selección Española, a capitá do Deportivo Abanca, co seu nocello esquerdo maltreito por unha dura entrada dunha futbolista alemá, fundiuse nun emocionado abrazo con todas as súas compañeiras de equipo, que non ocultaban o seu orgullo e a súa alegría por unha nova xesta do fútbol feminino galego.
En segundo plano agardaba Manu Sánchez, adestrador do equipo, o seu descubridor no fútbol e o que a incorporou ao Dépor, paso clave na carreira deportiva de Tere, consciente do potencial desta moza galega de sorriso permanente.
Xogadora e técnico fundíronse nun emocionante abrazo de benvida que expresa a complicidade entre ambos.
Tere Abelleira, acompañada por Estefi, pichichi do Deportivo Abanca esta temporada recentemente concluída, serán as encargadas, xunto aos capitáns do Deportivo (Laure, Álex Bergantiños, Lux e Mosquera) de entregar os premios aos gañadores do XIV Trofeo RC Deportivo benxamín e prebenxamín, que se xoga en Abegondo o mércores 17 de maio, Día das Letras Galegas.
De seguro a cidade deportiva de Abegondo, viveiro de futbolistas branquiazuis desde o ano 2003, tributará un emocionante aplauso a Tere polo seu gran papel con España na cita continental. Un chanzo máis na súa proxección como deportista.