O Deportivo sacou un novo empate sen goles, esta vez a domicilio, no Anxo Carro fronte ao CD Lugo, nun partido no que volveu ter maior control que o seu rival pero no que de novo non atopou o camiño do gol.
O técnico deportivista, Luis César, cambiou unha soa peza con respecto ás que presentou na pasada xornada fronte ao Alcorcón. Foi o regreso de Ager Aketxe á titularidade, en detrimento de Samuele Longo.
Saíu con maior forza o Lugo, que aos 4 minutos gozou dunha oportunidade moi clara nun man a man de Manu Barreiro ante Dani Giménez. O porteiro deportivista evitou o tanto lucense saíndo a tapar a internada do dianteiro local.
Pouco lle durou a forza ao equipo lucense. Transcorridos 10 minutos de xogo a posesión da pelota xa era coto practicamente exclusivo do Deportivo.
Aínda que os branquiazuis fixéronse co coiro non gozaron de moitas ocasións para abrir o marcador. Iso si, as poucas oportunidades foron realmente claras. Primeiro, nunha cabezada de Mollejo a falta lateral botada por Aketxe. Ander Cantero realizou unha gran intervención para despexar unha pelota que parecía que se coaba na portería branquivermella.
Recentemente superada a media hora de xogo, o Deportivo realizou unha gran acción combinativa pola dereita do ataque. Peru Nolaskoain acabou centrando por baixo para a chegada de Aketxe, que non puido precisar o seu remate co pé dereito, estrelando o balón no lateral da rede da portería de Ander Cantero.
No minuto 38, Mollejo gozou de dúas claras oportunidades consecutivas. En primeiro lugar, nunha cabezada franca, na que con todo non foi capaz de imprimir a forza necesaria para superar a Ander Cantero. Instantes despois, recuperou a bóla no saque de porta do Lugo antes de caracolear ao bordo da área, pero o seu disparo saíu demasiado centrado. Ander Cantero atrapouno sen excesivos apuros.
De novo saíu o Lugo na segunda metade con maior mordente, pero pronto o equipo branquiazul volveu facerse co mando. As primeiras oportunidades chegaron por medio de Vicente Gómez, nun disparo raso que rexeitou a zaga local após unha internada de Mujaid pola dereita, e nun disparo á media volta de Mollejo, que se marchou por riba do traveseiro.
Pouco despois respondeu o Lugo nun duro disparo de Rahmani desde a frontal da área, que se envelenou ao coller efecto cara a fóra da portería. Dani Giménez respondeu fenomenalmente, rexeitando o coiro cara á súa dereita para non dar opcións de remate ao conxunto local.
O Deportivo volveu achegarse con perigo noutras dúas ocasións consecutivas, a pouco máis de 10 minutos para o final. En ambas, con Koné como protagonista. Na primeira, o pase atrás do marfileño após recorte na liña de fondo atopou as pernas da defensa local. Na seguinte, o seu duro disparo raso desde o bordo da área acabou estrelándose no lateral da rede da portería após pasar moi preto do poste esquerdo.
O marcador acabaría sen moverse, co que o equipo branquiazul sumou un novo empate, o noveno no que vai de temporada en LaLiga SmartBank. E, por primeira vez na temporada, enlaza dous partidos seguidos sen encaixar un gol.
CD Lugo: Ander Cantero, Leuko, Marcelo Djaló, Peybernes, José Carlos, Rahmani, Fernando Seoane, Pita, Iriome (Tete Morente, min. 76), Cristian Herrera (Carlos Castro, min. 87) e Manu Barreiro (Carrillo, min. 70).
RC Deportivo: Dani Giménez, Mujaid, Lampropoulos, Somma, Luis Ruiz, Peru Nolaskoain, Álex Bergantiños, Vicente Gómez (Gaku Shibasaki, min. 70), Mollejo (Beto da Silva, min. 77), Aketxe (Borja Valle, min. 63) e Koné.
Árbitro: López Toca (c. cántabro). Cartón amarelo a Mujaid (min. 12), Fernando Seoane (min. 28), Pita (min. 42), Somma (min. 57) e Luis Ruiz (min. 64).
Incidencias: partido da 18ª xornada de LaLiga SmartBank disputado no Estadio Anxo Carro ante 4.511 espectadores, con algo máis de 600 deportivistas nas bancadas.
