O RC Deportivo pon á venda o mércores 25 de abril as entradas para o encontro da 36ª xornada de LaLiga Santander ante o Real Club Celta, o noso derbi do sábado 5 de maio ás 18:30 horas en Balaídos.
As entradas, dispoñibles até o xoves 3 ás 13:30 horas, teñen prezo de 30 euros.
Para adquirir estas localidades os afeccionados deben achegarse á Oficina de Atención ao Deportivista, que se atopa aberta de luns a venres de 10:00 a 13:30 e de 16:30 a 19:00 horas. O sábado 28 o horario de apertura da OAD é de 10:30 a 13:30 horas. O domingo 29, día do partido Deportivo-FC Barcelona, as entradas soamente estarán á venda nos despachos de billetes do Palacio dos Deportes de Riazor desde as 11:00 e até as 20:45 h. de maneira ininterrompida.
Cada socio poderá adquirir un máximo de 2 localidades co seu carné, só 2 entradas por persoa en portelo, e será imprescindible mostrar o DNI do destinatario dos tickets ou unha fotocopia do mesmo.
Os peñistas teñen que tramitar as súas entradas coa Federación de Peñas, que disporá da cota de entradas asignadas segundo o convenio entre o RC Deportivo e a propia Federación (40%: 314 do total de 786 que dispuxeron Celta e Dépor para ambos os partidos).
