RCD / NOVAS

"Estamos, estades a tempo de todo aínda. O obxectivo está aí", asegura Natxo na súa despedida

09/04/2019 11:45

Natxo González despediuse esta mañá en rolda de prensa en Abegondo. O técnico vasco estivo acompañado por unha representación do Consello de Administración, Ramón Piña e Dani Ramos; e polo director deportivo, Carmelo del Pozo, que tomou en primeiro lugar a palabra: "Deunos moitas mostras de que era unha idea boa, valorable; e reforzounos sobre a idea que tiñamos sobre el. Desde o Club e desde a miña persoa como responsable deportivo darche as grazas e pedirche desculpas se todos os que estivemos contigo non fomos capaces de axudarche no necesario. Foi un pracer. Estamos encantados de terte aquí connosco".

A continuación, Natxo González lembrou en primeiro lugar a súa chegada á Coruña coa súa familia hai 10 meses, "cunhas maletas cargadas de ilusión cara a un proxecto e cara a un reto de risco. Pero era motivante porque era un paso na miña traxectoria. Despois de 9 meses, 204 sesións, 33 partidos de liga, 13 vitorias, 15 empates, 5 derrotas, e en posicións play off toda a temporada, diríxome a vós por última vez".

Mostrouse "eternamente agradecido" a Carmelo del Pozo por darlle a posibilidade de adestrar ao Dépor, "obviamente co consentimento do Club, co presi Tino á cabeza. O único que podo dicir é grazas. Grazas por darme esta oportunidade de vir a este gran Club; coñecer A Coruña; a súa gastronomía, que non está nada mal".

"Grazas aos xogadores, á xente que rodea ao primeiro equipo, aos que estiveron á beira meu facéndome as cousas máis fácil en Abegondo, que foi practicamente a nosa casa. Ás rapazas do comedor, limpeza, aos encargados dos campos. Boa xente como xa sabía. Eu son do norte e somos do mesmo perfil", engadiu.

Confesa que se vai do Dépor "tranquilo, mesmo diría que contento coa aprendizaxe para o futuro. Non me vou decepcionado nin frustrado. Non me podo reprochar que non conseguise o obxectivo que me marcaron porque non cheguei ao final. Non sei que pasaría se chegase ao final. Estamos, estades a tempo de todo aínda. O obxectivo está aí".

Subliñou que está fóra "polo que transmitiu o equipo nas últimas xornadas, tocando fondo o sábado. Díxenlle a Carmelo que estaba con forza e teño capacidade para endereitar isto porque o fútbol o que hoxe é branco mañá é negro. Hai cousas que eu non podo controlar e decidiuse que non".

O ex adestrador deportivista insiste en que non se marcha decepcionado, "por suposto coa responsabilidade que me toca polos últimos resultados. Seguro que tomei malas decisións ou decisións equivocadas. Tamén boas, seguro. Pero isto é lei de vida. Son humano. Voume satisfeito coas decisións que puiden tomar no controlable, no que eu podo controlar. O que non é controlable é o que non puiden facer máis. Quizais é a única cousiña que me queda aí, que no incontrolable quizais podiamos facer algunha cousiña máis".

Tivo tempo até de chancear: "Díxenlles aos xogadores e a Carmelo: 'creo que vos equivocades porque este ano me tocaba ascender. Na miña última traxectoria, cada 3 anos, ¡pum, pum! ascenso. Síntoo. Perdestes unha gran oportunidade. Non digo que non se vaia a ascender. Pero esa bala perdéstela'", concluíu.

Acordouse Natxo da afección, á que quixo dar as grazas "polo respecto. Creo que é o máis importante dos clubs. Sei que están nun momento delicado porque nós posiblemente o provocamos. Están sensibles polo que están a vivir nos últimos tempos. Diríalles que non os deixedes, non deixedes ao equipo. O equipo mostrou sempre boa actitude. O outro día ouvín algún cántico de respectar o escudo ou algo así. Non teñades a menor dúbida de que este grupo respecta moito o escudo. Quizais o peso dese escudo está a facer mella neste rendemento individual. Por iso creo que é o contrario".

Aproveitou tamén para pedir desculpas "se houbo algún momento nos que se puido malinterpretar algunha declaración que puiden facer. Corrixino nalgunha rolda de prensa, nalgunha entrevista. Xamais vou ser tan cortiño como para buscarme problemas coa afección. Xamais os tiven e é o máis importante dos clubs".

Finalmente deu as grazas aos medios de comunicación que diariamente cobren a información do Deportivo por "o voso respecto, o voso trato cara a min. Sempre tratei de respondervos con sinceridade, con obxectividade. Vós sodes parte moi importante. Grazas polo voso respecto e obxectividade en moitos casos ou na maioría. Lévome un bo recordo de vós".

"A todos, aos meus ex xogadores, ao Club, aos medios, á xente... aquí tédesme para o que necesitedes. Quérovos e sempre serei do Dépor, aínda que fose unha estancia curta", concluíu Natxo González.

Máis novas de: NATXO GONZÁLEZ