Fernando Navarro cualifica de ''incómodo'' o Coliseum Alfonso Pérez

Engade o futbolista catalán outra dificultade: "o tipo de campo que é, un campo esvaradío, que está normalmente duro.E logo están eles como equipo. É un equipo moi organizado, que sabe moi ben cales son as súas virtudes e os seus defectos. Xa non só polo campo senón polo rival o partido é complicado".

Do equipo madrileño, subliña o lateral deportivista a súa traxectoria, "moi boa en casa. Conseguiu bater a rivais importantes".

Opina o campión de Europa que "a min particularmente xogar en Nadal non é o que me gusta. Pero está posto así pola liga e é un partido nunha data especial, co condicionante das festas que están por medio. Nós desde que chegamos o día 26, o foco está posto xa totalmente no partido do Xetafe".

Insiste Navarro en que toda a atención está posta en Xetafe, "sabendo que vai ser un partido importante para nós. De gañar a non gañar hai moito. Conseguiriamos facer outra brecha coa parte de abaixo e para iso estamos. É famoso o que se di do 'partido a partido' pero ao final é a realidade. O importante é o partido de Xetafe, e xa haberá tempo para pensar no Vilarreal e no partido de Copa".

A nivel persoal, mostrouse "contento coa traxectoria do grupo, do rendemento a nivel grupal e individual. Cando cambias de equipo sempre tentas entrar con bo pé, xogar, que o equipo vaia ben. Estou contento na cidade, tanto a miña familia como eu. E de momento todo está a ser positivo".