Fernando Vázquez comentou así na sala de prensa de La Rosaleda a polémica xogada, con man incluída, no gol do Málaga, ao cabo definitivo: "Eu estaba na bancada, non o aprecio. Pero dinmo os xogadores e daquela todo o mundo a quen pregunto. Unha man, tanto voluntaria ou involuntaria, se a acción acaba en gol debe ser anulada".
Subliña que "recoñecendo o mal partido noso, para min é incrible, alucinante que un árbitro que é consciente da man, pola explicación que lle dá aos xogadores, se ten dúbidas, por que non o vai a ver ao VAR? Aquí hai intereses moi importantes. Por encima dos méritos deportivos están os intereses do Deportivo, dos xogadores, do seu adestrador, da afección. Estou indignado por isto e molesto por como xogou o meu equipo hoxe".
O técnico deportivista márchase de Málaga "decepcionado co rendemento do equipo, non dos xogadores. E iso é máis do adestrador. Non estiven acertado hoxe porque o que pretendía non saíu. É posible que me equivocase no que pensaba do partido ou é posible que me equivocase nalgún xogador a nivel individual".
Finalmente, apunta que "estabamos nunha situación complicada e a situación complicada segue estando aí. Tiñamos hoxe unha final para poder virtualmente superala. Estariamos de celebración e agora estamos co peso da responsabilidade para cumprir co obxectivo marcado".
Pola súa banda, Sergio Pellicer, técnico do Málaga CF, felicitou aos seus xogadores polo triunfo e destacou que "desde o primeiro momento habemos ir a pola vitoria".
