RCDeportivo RCDeportivo RCDeportivo
Skip to main content
GL
PORTADA

Fernando Vázquez: "O equipo vai collendo o ritmo. Cando vas mellorando individualmente, colectivamente tamén o fas"

Fernando Vázquez asegurou na sala de prensa de Abegondo que o Deportivo vai "collendo o ritmo de competición, que a moitos futbolistas faltáballes. Cando vas mellorando individualmente, colectivamente tamén o fas".

En canto ao encontro ante o Coruxo FC deste domingo 8 de novembro en ABANCA-RIAZOR (12:00 horas, TVG), apunta sobre Borja Granero que "ten un problema no xeonllo. Esta semana non estivo a adestrar. Mañá miramos e tomaremos unha decisión de se está para competir".

Ao técnico deportivista gustaríalle que "o segundo tempo do Salamanca fose o primeiro do Coruxo; que independentemente do resultado, o equipo mostre máis forza, enerxía, agresividade; que este movemento do equipo sexa máis armónico no terreo de xogo; e que vexamos máis continuidade no fútbol do Dépor. Iso é o que espero esta fin de semana".

Do pasado domingo ante Unionistas de Salamanca, Fernando Vázquez destaca "mellorías individuais que son evidentes en moitos futbolistas; e especialmente no segundo tempo tomamos unha decisión de esperar un pouco máis atrás. Funcionou perfectamente, pero contando que o marcador era favorable. O pensamento estratéxico o día do Compostela non era o mesmo que o día do partido en Salamanca. E por tanto o equipo estivo máis dubitativo en Santiago que en Salamanca, onde tiña máis claro o que tiña que facer e fíxoo perfectamente".

Advirte que en Segunda División B "ninguén renuncia á pelota" e advirte que o Coruxo FC manterá "unha idea xeral non moi diferente á que nos expuxo Unionistas ou o mesmo Salamanca CF aquí en ABANCA-RIAZOR".

Este domingo, Fernando Vázquez cumprirá a sanción que arrastraba da temporada pasada e que lle impediu sentar no banco durante estes primeiros partidos de liga: "Tiven moito tempo para pensar. Coincidiu ademais con momentos importantes para o Deportivo. Foi un erro do cal saco as miñas conclusións e espero que non me volva a pasar. Sentín impotencia nalgún momento. Sabía que o equipo me necesitaba ao final do ano pasado e necesítame especialmente cando se inicia a competición. Por tanto teño moitas ganas de volver e penso volver para non volver recaer".