Carles Gil e o goleador Quique González atenderon aos medios de comunicación na zona mixta do Estadio Francisco de la Hera.
O atacante valenciano cre que fóra de casa "os puntos valen por 2. En Segunda estes campos son moi complicados. Son equipos recentemente ascendidos moi presionantes, moi intensos. O campo non está do todo ben aínda. É máis difícil ter un xogo fluído. Tres puntos importantísimos".
Carles subliña que nestes primeiros partidos de temporada, "o máis importante ademais de ter boas sensacións como tivemos a pesar de ter moita marxe de mellora, é 3 puntos fóra de casa. Temos un inicio de calendario peculiar polo do campo, e son 3 puntos fundamentais".
Pola súa banda, Quique González cualificou o encontro como "moi disputado, moi traballado. En Segunda División hai partidos que se gañan sufrindo. O equipo fixo un traballo de 10".
Valorou o seu tanto, que serviu para sumar o primeiro triunfo, pero subliña que "o importante é o colectivo. Estou moi feliz porque son 3 puntos moi importantes para empezar a liga moi ben. Este é o camiño a seguir. No persoal moi contento. Espero seguir así mellorando para axudar ao equipo".
Queda o 7 deportivista co seu traballo, o de Carles... "Fáloche da xente de arriba pero aquí traballamos todos. Estamos para sumar. Hai moi bos xogadores. O máis importante é que á parte das súas calidades técnicas, en Segunda como non compitas, como non loites igual que o contrario, estás morto. Estamos a facelo. Isto acaba de empezar. Non fixemos nada. Hai que estar felices", engadiu.
