O meta deportivista Francis Uzoho foi convocado por Nixeria para dúas novas probas de cara ao Mundial de Rusia 2018.
O venres 23 de marzo, Nixeria enfróntase a Polonia en Breslavia (20:45), e o martes 27 terá como rival a Serbia en The Hive Stadium en Londres (21:00, hora local).
Por conseguinte, Francis será baixa para o partido do Fabril ante o Pontevedra da próxima fin de semana.
Suíza preparará con Schär a cita mundialista
Suíza citou ao deportivista Fabian Schär para dous amigables de preparación para o próximo Campionato do Mundo.
Así, o venres 23 de marzo, os suízos xogan ante Grecia en Atenas (20:00 hora local), e o martes 27 de marzo no Swissporarena de Lucerna (19:00 horas) ante Panamá.
O central branquiazul emprendeu viaxe após o encontro de onte no Estadio ABANCA-RIAZOR ante a UD Las Palmas.
Escocia e Tunisia, próximos compromisos da Costa Rica de Celso Borges
A selección de Costa Rica, con Celso Borges entre os convocados, preparará ante Escocia e Tunisia a próxima cita mundialista.
O venres 23 de marzo Costa Rica visita a Escocia no estadio Hampden Park (19:45, hora local) de Glasgow, e o martes 27 de marzo mídese a Tunisia no Alliance Riviera da cidade francesa de Niza (20:00 horas).
Mañá luns 19 de marzo, o mediocentro deportivista deberá incorporarse á concentración da súa selección en Glasgow.
Dous novos amigables para Florin Andone con Romanía
O dianteiro deportivista Florin Andone foi convocado polo seu equipo nacional, Romanía, para dous partidos amigables.
Así, o venres 23, os romaneses visitan a Israel, na cidade de Netanya (20:30, hora local), e o martes 27 reciben no Ion Oblemenco de Craiova (Romanía) a Suecia (20:30).
Andone lesionouse onte ante a UD Las Palmas no xemelgo interno da súa perna esquerda. Os Servizos Médicos do Dépor xa informaron á Federación Romanesa de Fútbol.