Ian Mackay cualificou esta mañá na sala de prensa de Abegondo o partido deste sábado 3 de decembro en ABANCA-RIAZOR (19:00 horas, TVG-2 e InSports.tv) ante o Córdoba CF como "moi importante para poder acurtar puntos e achegarnos á cabeza da clasificación".
Con 32 puntos os andaluces por 25 os branquiazuis despois de 13 partidos, opina que "agora mesmo é un momento clave. Se conseguimos levar os 3 puntos van estar moi preto e na moral vainos a vir moi ben, pero non creo que sexa determinante se non conseguimos os 3 puntos. Non cabe outra cousa na miña cabeza que non sexa levarnos os 3 puntos. Non miro outro escenario que non sexa ese".
Do conxunto andaluz, apunta que "está a facer moi boa temporada, está a ter moi bos números e nós temos que facer o noso partido. Estamos en liña ascendente desde hai algún tempo, creo podemos facerlles dano e os 3 puntos téñense que quedar en ABANCA-RIAZOR".
Admite que "o principio de temporada do ano pasado foi espectacular. Ata que nos fomos de vacacións os números foron incribles. Tivemos un mes malo que nos pasou factura e o Racing de Santander tivo unha segunda volta incrible"; e no presente curso pide seguir "o tópico do partido a partido para seguir sumando de 3 en 3 e achegarnos á cabeza, que é o que todos queremos e oxalá podamos estar aí arriba canto antes".
Recalca que "estamos en moi bo momento. Desde que chegou o novo míster os números son moi bos. O problema foi o partido da Cultural, que non conseguimos sacar os 3 puntos con moitísimas ocasións a favor. Foi unha pena non conseguilo, pero estamos nun moi bo momento e oxalá podamos demostralo o sábado e levarnos os 3 puntos con #ANOSAFORZA, que creo que vai haber un ambiente espectacular como hai sempre en ABANCA-RIAZOR. Esa é a realidade e oxalá que nos vaiamos todos contentos para casa".
A nivel individual cre que o seu segredo para a súa recuperación estriba en que "cando me lesiono intento poñer todo da miña parte para poder recuperarme canto antes, para tentar axudar ao equipo. Aquí temos a sorte de contar cun corpo médico que é espectacular. O médico está todo o intre encima, os fisios, o recuperador... E xuntamos todo iso nunha soa cousa que é tentar volver canto antes. E tiven a sorte de que a recuperación foi ben en todo momento. Tamén hai xente doutros equipos, incluso outros compañeiros doutros equipos que me preguntan como é posible. Cando me lesiono intento centrarme na lesión, en poñer todo o que teña ao alcance para poder recuperarme canto antes e por sorte foi así".
Titular a pasada fin de semana en Fuenlabrada, o futbolista coruñés di sentirse "moi ben. Non tiven ningunha molestia no partido, que é o que máis me importaba. Non me impediu facer ningún momento e estou moi contento con iso. A lesión está non esquecida ao 100% porque tes que coidarche e seguir fortalecendo para que volva estar como antes, pero non teño ningún resentimento sobre a lesión".
Desvela que o partido que lle tocou vivilo desde o banco, en ABANCA-RIAZOR ante a Cultural Leonesa, "pásase moi mal. Cústame medir moito, protesto moito, son bastante vinagre nesas cousas e algún día pódeme pasar factura cos xuíces de liña e os árbitros. Pásase moi mal porque é unha impotencia non poder axudar ao equipo desde dentro"; e tanto do seu substituto nese partido, Edu Sousa, como de Pablo Brea, titular en Copa, afirmou que "son dous grandes porteiros, traballan incrible, tentan axudar sempre ao equipo en todo o que poden e cando entran a xogar fan un moi bo papel".
