RCD / NOVAS

José Manuel Rodríguez recibe a insignia de ouro e brillantes do RC Deportivo após 50 anos traballando no Club

27/04/2022 11:19

Un dos momentos máis emotivos da Gala de Entrega de Insignias de Prata desta temporada, celebrada un ano máis en Palexco, foi o recoñecemento, após a súa recente xubilación, a José Manuel Rodríguez Barbeito (A Coruña, 12 de febreiro de 1957). O presidente Antonio Couceiro fíxolle entrega da máxima distinción do Club: a insignia de ouro e brillantes do RC Deportivo.

José Manuel traballou toda a súa vida no RC Deportivo, desde que comezou con 15 anos na antiga sede do Club en Santa Catalina, até a súa xubilación este ano, 50 despois. Empregados, presidentes, directivos e afeccionados viron durante décadas como aquel neno que comezou facendo recados para a entidade converteuse nun dos rostros máis anónimos para o gran público pero máis reconocibles para os miles de Deportivistas que cada temporada pasaron polos despachos de billetes da Mariña, o Palacio dos Deportes ou a Oficina de Atención ao Deportivista do Estadio ABANCA-RIAZOR.

O RC Deportivo quere agradecer a José Manuel a súa entrega en toda unha vida dedicada ao Club e, sobre todo, desexarlle que disfute coa súa familia e amigos dunha máis que merecida e traballada xubilación. Grazas compañeiro, grazas Deportivista!