O descanso do partido Deportivo-Alavés serviu para homenaxear, a título póstumo, a un dos socios máis veteranos do Real Club Deportivo, D. Juan José Ponte Veira. O histórico Deportivista, socio número 6 do Club, faleceu o pasado mes de decembro, nunha temporada na que debía recibir, após 75 anos ininterrompidos como abonado, a súa insignia de ouro e brillantes do Deportivo.
Nun sinxelo pero emotivo acto, o presidente do Real Club Deportivo, Fernando Vidal, fixo entrega aos netos de Juan José: Ledicia, Juan e Patricia, da insignia do seu avó mentres unha imaxe súa aparecía nos videomarcadores do Estadio. Os 1.000 afeccionados presentes tributábanlle unha sentida homenaxe en forma de aplausos e desde a megafonía lembrábanse o tres cuartos de século de Deportivismo de Juan José, irmán ademais do histórico xogador do Depor Enrique Ponte.
A situación sanitaria está a impedir realizar, como noutras temporadas e no formato habitual, as entregas das insignias de ouro e de prata aos socios que levan 50 e 25 anos vinculados ao Club. Nos próximos días informarase, a todos os socios e en especial aos homenaxeados, de como se lles vai a tributar ese merecido recoñecemento por tantos anos de fidelidade Deportivista.
