Juanfran cre que en Sevilla ''hai que ser intelixentes e xogar coa máxima concentración''

O lateral deportivista razoa que "a salvación non está conseguida, e ata que non estea conseguida perigo sempre hai. Pero hai 9 puntos por encima do descenso. Os equipos de descenso teñen que facer 9 puntos para chegar onde estamos nós e nós non temos que puntuar nada. Así que nós temos que centrarnos en nós mesmos, e esta semana hai que conseguir tres puntos de nove como sexa".

 

Sobre o encontro deste domingo 17 de abril no Ramón Sánchez Pizjuán (16.00 horas, Canle+ Liga / Abono Fútbol), opina Juanfran que "en todos os campos se debe saír a competir e en todos os campos débese saír a gañar".

 

Sostén que beneficia ao Dépor o feito de que o Sevilla se xogue mañá xoves o pase ás semifinais da Europa League: "vaino a notar. Vai ser un partido duro ante o Athletic. Mesmo pode haber prórroga e que o partido sexa longo e difícil. É o partido máis importante que teñen esta tempada. Claro que nos beneficia porque nós imos chegar máis frescos. É un partido que non podemos dar por perdido. Temos que tentar puntuar porque un punto, tres puntos achéganche moitísimo ao obxectivo".

 

Apunta Juanfran que será fundamental "ser intelixentes, ir coa máxima concentración e porlles as cousas moi complicadas". 

 

Confesa que "non significa nada para min" visitar o Sánchez Pizjuán: "O meu pasado (bético) pasado está grazas a deus. Xa está afastado. Estou aquí, son feliz e o especial sería poder gañar pola nosa afección, por conseguir o obxectivo, por afrontar unha semana con moita ilusión por gañar".