Laura María Fernández Borge (Medina de Rioseco, Valladolid, 12 de abril de 1992) ampliou o seu compromiso co Deportivo ABANCA por unha temporada máis.
No seu primeiro curso nas filas branquiazuis, Laura participou en 22 partidos: 20 (11 como titular) en Reto Iberdrola, 1 de playout e 1 de Copa da Raíña, nos que totalizou 6 goles, todos no campionato ligueiro.
A dianteira valisoletana conta cunha ampla experiencia na máxima categoría nacional, na que disputou 85 partidos e marcou 11 goles ao longo de 7 temporadas nas que, ademais, puido celebrar a conquista de dúas Ligas.
Despois de xogar no Juventud Rondilla (2008-2009), debutou na máxima categoría co Real Valladolid (2009-2011), antes de abandonar momentaneamente o fútbol once. Laura uniuse ao Valladolid Fútbol Sala Feminino, co que xogou dúas campañas na Primeira División desa disciplina (2011-2013).
Laura volveu ao verde en 2013 co CD Parquesol de Valladolid e, após dúas campañas, asinou polo Atlético de Madrid para a Temporada 2015-2016. Ese curso disputouno co equipo B, co que anotou 14 goles, pero ao seguinte incorporouse ao primeiro cadro, na que militou dúas temporadas (2016-2018). Neses dous anos Laura formou parte do cadro que conquistou dúas Ligas.
Dous cursos no Madrid CFF (2018-2020) e un no RCD Espanyol (2020-2021) pechan o curriculum de Laura Fernández.
Con esta oitava renovación, o cadro do Deportivo ABANCA 2022-2023 atópase da seguinte maneira: Yohana e Lucía Alba (porteiras), Inés Altamira, Raquel García, Patri López, Cris Martínez (defensas), Paula Gutiérrez, Carlota Sánchez, Eva Dios, Letti (centrocampistas), Ainhoa Marín, Aroa, Laura Fernández, Carlota Suárez, Millene e Marta Charle (dianteiras).
