RCD / NOVAS

Laure: "Temos que seguir con esa fame de querer mellorar"

16/01/2017 21:15

O capitán Laure manifestou esta mañá na sala de prensa de Abegondo que se marchou do Estadio de Riazor o pasado sábado, co empate (0-0) ante o Villarreal, con "unha sensación agridoce. Ao final queres os tres puntos. Tivemos ocasións máis claras".

A nivel individual, confesou estar "contento por participar e por saír desa focha de lesións". "Estiven lesionado pero traballei moito esperando este momento. Ves complicada a túa participación porque hai compañeiros que o están facendo ben, está o equipo ben. Ese traballo á sombra merece a pena porque te atopas moito mellor no campo", explica.

Cre o lateral deportivista que a estas alturas da temporada "o equipo está ben. Estamos a facer as cousas ben. Estamos necesitados de puntos. Temos que seguir con esa fame de querer mellorar e de conseguir puntos porque aínda estamos aí abaixo e é importante saír desta situación".

Non se fía dos equipos que marchan por detrás na táboa: "En calquera momento pode chegar o seu momento, que aperten, que atopen partidos, que atopen puntos. Nós temos que estar lonxe".

Preguntado por Kakuta, Laure o ve como "un futbolista que nos pode dar moito, contrastado e con moita calidade. Benvido sexa. Vai haber unha competencia enorme nas bandas e en todas as posicións, e iso é boísimo para o equipo".

Máis novas de: LAURE