O Deportivo sumou tres importantes puntos ante o RC Celta B con goles na segunda parte de Lucas Pérez e Alberto Quiles, o segundo após un claro penalti sobre Max Svensson, para iniciar con forza o sprint final do curso, rompendo unha serie de tres xornadas sen coñecer a vitoria.
Óscar Cano, técnico deportivista, realizou un só cambio con respecto ao once presentado o pasado domingo en León. Diego Villares regresou ao equipo inicial en lugar de Olabe, sancionado por acumulación de amoestacións.
O RC Celta B plantouse en ABANCA-RIAZOR cun 5-4-1 co que deixou claras as súas intencións. O resultado, unha primeira media hora sen unha soa chegada ás áreas.
O primeiro disparo produciuse no minuto 25, nunha falta desde 35 metros de Carlos Domínguez que mandou o esférico ás nubes.
A primeira acción trenzada de ataque púxoa o Dépor, nun disparo de Rubén Díez que se estrelou nas pernas dun defensa visitante após recibir un pase de Lucas no punto de penalti, nunha xogada que iniciara o propio centrocampista maño.
Pablo Martínez tentouno de lonxe no minuto 37. O seu potente disparo foise á dereita do portal celeste.
No minuto 41 produciuse a xogada máis importante da primeira metade, cando Medrano viu o segundo cartón amarelo ao derrubar a Mario Soriano cando se coaba na área. O libre directo lanzouno Lucas, moi por riba do traveseiro.
Para finalizar o primeiro acto, Mario Soriano, no minuto 44, buscou en profundidade a Lucas que, escorado, rematou contra o corpo de Christian Joel.
Na segunda metade, o RC Celta B cambiou o seu plan ao quedar cun xogador menos. O conxunto vigués refixo o equipo con dous cambios tralo descanso e pasou a xogar cun 4-4-1, coas dúas liñas de atrás moi xuntas para evitar que os branquiazuis filtrasen balóns e tivesen pouco espazo ás costas da súa defensa.
Con todo, o Dépor atopou espazos e nos primeiros minutos xerou un bo número de chegadas que na súa maior parte acabaron en saque de esquina. Dous delas concluíron en remate. A primeira, no minuto 49, cando Mario Soriano bateu alto desde a frontal da área após controlar un servizo a media altura de Isi Gómez. A segunda, no minuto 58, máis clara, posto que Pepe Sánchez cabeceou ao traveseiro un centro de Rubén Díez desde a dereita. O rexeite caeu a perna cambiada a Diego Villares, que non puido precisar o seu remate. A zaga visitante afastou o perigo.
Superada a hora de xogo, Óscar Cano introduciu a Max Svensson en lugar de Isi Gómez, modificando o esquema inicial para xogar con dobre pivote e con dous puntas, aínda que con Lucas un pouco máis atrasado.
Só tres minutos despois, o propio Lucas abriu a lata. Corría o minuto 66 cando o dianteiro de Monelos recolleu un despexe da defensa após unha chegada clara desde atrás de Mario Soriano a centro de Antoñito, na que ao alcalaíno fóiselle o control, e o '7' branquiazul enganchou un zurdazo raso que entrou na meta viguesa preto da base do pau esquerdo. Foi o sétimo tanto de Lucas en 12 partidos desde a súa chegada no mercado de inverno.
Co marcador a favor e un home máis, o Dépor non concedeu unha soa opción ao RC Celta B, que apenas acercouse a área de Ian Mackay nun par de ocasións.
Antes, no minuto 69, Diego Villares acariñou o segundo tanto ao peitear un centro de Mario Soriano a perna cambiada. O coiro foise alto por pouco. E no minuto 78, Svensson anticipouse a Christian Joel nun balón longo, o porteiro visitante derrubouno e o colexiado decretou pena máxima. Quiles bateu ao gardameta para abrir brecha no marcador co seu undécimo gol da temporada.
Con este triunfo, o Deportivo rompe unha serie de 3 xornadas sen gañar (empates en campo do RB Linense e ante o RM Castela e derrota na visita á CyD Leonesa) para colocarse segundo na táboa, a 3 puntos do líder, o AD Alcorcón. Os branquiazuis deixaron hoxe a portería a cero por 14º encontro en 29 xornadas e, ademais, sumaron 19 dos últimos 21 puntos en xogo en ABANCA-RIAZOR, onde o balance é de 10 vitorias, 4 empates e 1 soa derrota.
RC Deportivo: Mackay, Antoñito, Pepe Sánchez (Lapeña, min. 86), Pablo Martínez, Lebedenko, Rubén Díez (Álex Bergantiños, min. 82), Diego Villares, Isi Gómez (Svensson, min. 63), Quiles (Yeremay, min. 86), Lucas e Mario Soriano (Saverio, min. 86).
RC Celta de Vigo B: Christian Joel, Carrique, Javi Domínguez, Carlos Domínguez, Gael Alonso (Montes, min. 81), Medrano, Raúl Blanco (Durán, min. 46), Martín (San Bartolomé, min. 46), Hugo Sotelo (Damián, min. 60), Hugo Álvarez e Lautaro (Manu Garrido, min. 64).
Goles: 1-0 Lucas (min. 66); 2-0 Quiles, de penalti (min. 80).
Árbitro: Miguel Ángel Pérez Hernández (c. madrileño). Expulsou por dobre amarela a Medrano (min. 41). Cartón amarelo a Medrano (min. 14), Antoñito (min. 27), Hugo Sotelo (min. 52), Lebedenko (min. 68), Damián (min. 76), Christian Joel (min. 78), Mario Soriano (min. 84) e Carrique (min. 89).
Incidencias: partido da 29ª xornada do Grupo 1 de Primera Federación disputado no Estadio ABANCA-RIAZOR ante 25.135 espectadores.
