Lucas insiste en que ''a liga do Deportivo é a salvación''

Confesa Lucas, bigoleador onte ante o Espanyol, estar "moi feliz, moi contento" co seu regreso a casa. "Desde o primeiro día que cheguei aquí e tiven a mala sorte de lesionarme souben que non me equivocaba ao volver á miña casa porque estaba moi feliz. Nunca me arrepentín de volver aquí".

 

Despedido onte do terreo de xogo cunha gran ovación por parte da bancada de Riazor, o atacante coruñés opina que "desde o primeiro día que cheguei a Coruña a afección tívome un agarimo moi especial. Nese sentido estou moi contento, non lles podo reprochar nada. O agarimo é algo de agradecer. É moi difícil de conseguir e conseguino desde o primeiro día. Creo que a ovación foi moi bonita, pero tamén foi para Fernando (Navarro) e para Pedro (Mosquera)". Engade Lucas que "o equipo está moi contento coa afección porque está nas malas e nas boas".

 

Non quere nin ouvir falar da palabra Selección: "penso só no Deportivo a día de hoxe. Xa bastante temos co noso. A Selección Española ten os mellores xogadores do mundo, é a mellor selección do mundo para min, así que non está na miña cabeza. Eu tento traballar, facelo o mellor posible. Se se fala diso é porque o traballo estou a facelo ben, e nesta liña teño que seguir".

 

Do encontro de Granada o vindeiro sábado 3 de outubro ás 18.15 (Canle + Liga / Abono Fútbol), opina que "imos xogar ante un equipo necesitado no seu campo e vai apertar moito. Sabémolo que vai pasar desde o minuto uno. E estámolo preparando toda a semana para chegar o mellor posible e gañar outra vez fóra de casa que para nós é moi importante".